Jaıly mektep salýdyń jańa tórtinshi tásili ázirlendi
ASTANA. KAZINFORM – Jaıly mektep salýdyń jańa tórtinshi tásili ázirlendi. Bul týraly Úkimet otyrysynda «Jaıly mektep» ulttyq jobasyn iske asyrý barysyn baıandaǵan Oqý-aǵartý mınıstri Ǵanı Beısembaev aıtty.
«Byltyr qazan aıynda mınıstrlik ulttyq jobaǵa «Atameken» ulttyq palatasynyń jáne salalyq qaýymdastyqtardyń usynystary eskerilgen otandyq óndirýshilerdi qoldaý boıynsha qosymsha sharalardy engizdi», - dedi mınıstr.
Onyń atap ótýinshe, atalǵan sharalarǵa sáıkes:
- jaıly mektepterge qajetti jıhaz «Samuryq-Qazyna» jáne «Atameken» tizilimine engen otandyq óndirýshilerden ǵana satyp alynady;
- mektep qurylysynda, onyń ishinde syrtqy qasbetterde jergilikti óndirýshilerdiń ónimderi paıdalanylady, sondaı-aq tıimdi sharttarǵa negizdelgen aldyn-ala kelisimshart jasaý tásilin qoldanylady.
«Ulttyq joba eń aldymen bilim berý sapasyn qamtamasyz etýge jáne oqý protsesin uıymdastyrýdyń tıimdiligine yqpal etýi tıis. Sondyqtan Oqý-aǵartý mınıstrligi «Bilim berýdegi ózgeristerdiń 1000 kóshbasshysy» jobasy aıasynda jaıly mektepter úshin jańa býyn dırektorlarynyń korpýsyn irikteýdi qolǵa aldy. Jańa mektepterdi kadrlarmen qamtamasyz etý úshin jas kadrlardyń jáne tájirıbesi bar muǵalimderdiń biliktiligin arttyrý jolymen pedagogter bazasy qalyptastyrylyp jatyr. Elimizdiń jetekshi mektepteriniń tájirıbesi negizinde oqý protsesiniń mazmunyn jetildirýge baǵyttalǵan bilim berýdi uıymdastyrýdyń jańa modeli ázirlenýde», - dedi ol.
Ǵanı Beısembaevtyń aıtýynsha, jaıly mektepterdiń qurylysy 3 tásil arqyly júzege asyrylady. Birinshiden, «Samuryq-Qazyna Konstrakshn» arqyly mektepterdiń nysanaly qurylysy salynady. Ekinshi, ákimdikter jeke ınvestorlardan daıyn ǵımarattardy taýar túrinde satyp alady. Úshinshi, memlekettik-jekeshelik áriptestik aıasynda mektepter salynady.
«Mınıstrlik ulttyq jobany iske asyrýǵa jeke ınvestıtsııalar tartý maqsatynda mektep salýdyń jańa tórtinshi tásilin ázirledi. Bul tásil jeke ınvestor jáne jetekshi bilim berý uıymy qatysatyn konsortsıým qurý arqyly iske asyrylady. Tórtinshi tásildi iske asyrý kezinde memlekettik bilim berý tapsyrysyn ornalastyrý arqyly jáne keıinge qaldyrylatyn mindettemeler esebinen bıýdjetke júkteme azaıady jáne qurylystyń qymbattaý táýekelderi bolmaıdy. Investorlardy irikteýdi ákimdikter konkýrstyq negizde júzege asyratyn bolady», - dedi mınıstr.
