«Jaıly mektep» qurylysy máz emes – Prezıdent tekserý júrgizedi

BÝRABAI. KAZINFORM – Aldaǵy úsh jylda 1300 mektepti, sonyń ishinde aýyldaǵy 900 bilim ordasyn jańǵyrtý qajet. Bul týraly Memleket basshysy Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda aıtty.

Osydan 2 jyl buryn Prezıdent tapsyrmasymen «Jaıly mektep» ulttyq jobasy bastalǵan edi. Jobanyń negizgi maqsaty – mekteptegi oryn tapshylyǵyn joıý, apatty jáne úsh aýysymdy mektepter máselesin sheshý boldy.

− Aqmola oblysy ulttyq joba boıynsha salynatyn barlyq mekteptiń qurylysyn birinshi bolyp aıaqtady. Aımaqta 12 myńnan astam oqýshyǵa arnalǵan jańa bilim oshaqtary ashyldy. Basqa oblystarda qurylys barysy máz emes. Úkimet pen «Samuryq-Qazyna» qory bul jumysty qolǵa alýy kerek. Men taıaý arada tekseremin, − dedi Qasym-Jomart Toqaev.

Sondaı-aq, Prezıdenttiń aıtýynsha, bıyl elimizde 500 myń oqýshyǵa arnalǵan 200-den astam mektep salynady.

− Myna jaıtty qaperde ustaǵan jón: barlyq jerde tek «Jaıly mektep» jobasy aıasynda mektep salý mindetti emes. Sapaly salynǵan qarapaıym mektepterge de suranys joǵary. Úsh jylda 1300, sonyń ishinde aýyldaǵy 900 bilim ordasyn jańǵyrtý qajet. Jańa oqý jylyna deıin memlekettik jáne jekemenshik mekteptiń barlyǵy balalardyń qaýipsizdigin qamtamasyz etetin arnaıy quraldarmen jabdyqtalýǵa tıis, − dep tapsyrma berdi Memleket basshysy.

Buǵan deıin Prezıdent jappaı tsıfrlandyrý men jasandy ıntellektini barlyq salaǵa keńinen engizý týraly tapsyrma bergen edi.