«Jaıly mektep» erekshe balalarǵa da qoljetimdi bolýy kerek - depýtat
TÚRKІSTAN. KAZINFORM – Májilis depýtaty, «AMANAT» partııasy fraktsııasynyń múshesi Erlan Ábdıev Túrkistan qalasyndaǵy «Jaıly mektep» jobasy aıasynda salynyp jatqan 2000 oryndyq bilim berý mekemesiniń qurylys barysymen tanysty.
Memleket basshysy Qasym-Jomart Toqaev úsh aýysymda oqıtyn jáne apatty jaǵdaıdaǵy mektepter máselesin sheshý úshin «Jaıly mektep» ulttyq jobasyn qabyldaýdy tapsyrǵan bolatyn. Onyń aıasynda Túrkistan oblysynda 49 myń oqýshyǵa arnalǵan 63 mektep salý josparlanǵan. Túrkistan qalasyndaǵy «Jańa qala» shaǵyn aýdanynda 2 myń oryndyq zamanaýı mekteptiń qurylysy ótken jyldyń maýsym aıynda bastalǵan edi. Jobanyń quny 8 mlrd teńge, al mekteptiń jalpy aýdany 20 myń sharshy metrdi quraıdy. Bilim ordasyn jyl sońyna deıin paıdalanýǵa berý kózdelip otyr.
Májilismen Erlan Ábdıev atalǵan nysan «AMANAT» partııasynyń Túrkistan oblystyq saılaýaldy baǵdarlamasyn júzege asyrý jónindegi Jol kartasyna engizilgenin atap ótti.
– Bilim oshaǵynyń qurylysy kestege saı qarqyndy júrip jatyr. Degenmen aty «Jaıly mektep» bolǵandyqtan, ol barlyq jaǵynan jaıly, qolaıly bolǵany durys. Men bastapqy jobada eki lıft bolǵanyn baıqadym, biraq tapsyrys berýshi ony qaıta túzetip, bireýin qaldyrypty. 2000 balaǵa bir ǵana lıftiniń bolýy aqylǵa syımaıdy. Osy jaıtty qaıta qalpyna keltirýdi usynamyn. Odan bólek múgedektigi bar adamdarǵa arnalǵan mehanıkalyq satyny pandýsqa aınaldyrǵan jón. Óıtkeni kóp jaǵdaıda mehanıkalyq saty tez buzylady jáne ony únemi bir maman qadaǵalap otyrýy kerek, – dedi depýtat.
Qurylys jumystarynyń barysy týraly «AMANAT» partııasy Túrkistan oblystyq fılıalynyń tóraǵasy Altynsary Úmbetalıev pen «Karatas Maınıng» JShS merdiger kompanııa ókilderi baıandady.
Depýtat jańa mektep qurylysynyń aıaqtalýyn asyǵa kútip júrgen jergilikti turǵyndarmen de tildesti.
– Jańa mekteptiń qurylysyn kórip, balalarymyzdyń bolashaǵy úshin qýanyp otyrmyz. Sebebi bul jańa aýdan bolǵandyqtan ázirge balalarymyz basqa jaqqa qatynaýǵa májbúr. Osy mektepte balalarymyz sapaly bilim alyp, jarqyn bolashaqqa jol ashady dep senemiz, – deıdi jergilikti turǵyn Aıgúl Ahmetova.
