«Jaıly mektep»: bıyl 1 qyrkúıekte qansha mektep paıdalanýǵa beriledi

ASTANA. KAZINFORM – Búginde elimiz boıynsha 208 jaıly mekteptiń qurylysy júrip jatyr. Onyń ishinde 98 mektep bıyl jańa oqý jylynda paıdalanýǵa beriledi.

Bul týraly «Samruk-Kazyna Construction» AQ tóraǵasynyń birinshi orynbasary Ǵabıt Malǵajdarov málim etti.

«Jaıly mektep» ulttyq jobasy Prezıdenttiń tikeleı tapsyrmasymen júzege asyp jatyr. Maqsat – apattyq jaǵdaıdaǵy jáne úsh aýysymdy mektepterdi joıý. Joba aıasynda elimizde 369 jaıly mektep salý josparlanyp otyr. Bul degenimiz 740 myń oqýshyǵa arnalǵan oryn. Aldaǵy úsh jylǵa 2,3 trln teńge bólingen, qazir 208 mekteptiń qurylysy júrip jatyr. Olardyń qurylysy ótken jyly bastaldy, bıyl jyl sońyna deıin paıdalanýǵa berilýi tıis», - dedi Ǵabıt Malǵajdarov «Samuryq-Qazyna» AQ-nyń qoǵamdyq keńesi barysynda.

Onyń aıtýynsha, bıyl 1 qyrkúıekte el boıynsha 98 jaıly mektep paıdalanýǵa berilýi tıis. Qalǵan 110 mektep osy jyldyń aıaǵyna deıin qoldanysqa beriledi.

«Bıyl paıdalanýǵa berilýi tıis mektepterdiń jobalyq qujattamalary ázirlenip, merdiger kompanııalar belgilendi. Qazir memlekettik saraptamadan ótip jatyr. Úkimet basshysynyń tapsyrmasy boıynsha osy jyly mamyrǵa deıin barlyq saraptamanyń nátıjesi belgili bolady», - deıdi spıker.