«Jaıly mektep»: Atyraýda ulttyq jobamen salynǵan úshinshi bilim ordasy ashyldy
ATYRAÝ. KAZINFORM – Atyraý qalasynda «Jaıly mektep» ulttyq jobasymen salynǵan úshinshi bilim ordasy qoldanysqa berildi. Jańa mektep 1200 oqýshyǵa arnalǵan.
Atyraý oblysynyń ákimi Serik Shápkenovtiń málimetinshe, munaıly shahar mańyndaǵy Vodnıkov aýylynda boı kótergen №50 orta mektepte eki aýysymda 2 400 bala bilim alady.
– Memleket basshysynyń tapsyrmasyna sáıkes óńirde bilim berý ınfraqurylymyn damytý maqsatynda birqatar joba iske asyrylyp jatyr. Aldaǵy eki jylda úsh aýysymdy jáne apatty dep tanylǵan mektepter máselesin túbegeıli sheshý úshin 30-ǵa jýyq bilim ordasynyń qurylysyn aıaqtaý josparlanyp otyr. Aldaǵy jyly «Jaıly mektep» ulttyq jobasymen taǵy 6 mektep paıdalanýǵa beriledi. Al Vodnıkov eldi mekeninde turatyn otbasylardaǵy balalary bul kúndi kópten kútti. Jańa mektepte oqýshylarǵa bilikti ustazdar sabaq beredi. Osy mektepten túlep ushqan ár shákirt elimizdiń erteńi úshin adal qyzmet eter ulanǵa aınalatynyna senemin, -dedi Serik Shápkenov.
Ákimniń aıtýynsha, endi ata-analar balasyn kórshi eldi mekendegi, ne qaladaǵy mektepterge tasymaldaý qıyndyǵynan qutyldy.
– Aýylymyzda jaıly mekteptiń ashylǵanyna óte qýanyshtymyz. Buryn balamyzdy kórshiles aýyldaǵy mektepke tasymaldaıtyn edik. Endi jańa bilim ordasynda bilim alady. Mekteptiń atyna zaty saı ekenin kórip turmyz. Balalarymyz osy mektepte sapaly bilim alyp, bolashaqta úlken jetistikke jetetinine úmit artamyn, -deıdi aýyl turǵyny Nazgúl Qashaýova.
Jaıly mekteptegi beınebaqylaý kameralary Atyraý qalasyndaǵy jedel basqarý ortalyǵyna qosylǵan. Bilim ordasynda erekshe bilim berýdi qajet etetin balalarǵa kedergisiz orta qarastyrylǵan. Bastaýysh jáne joǵary synyp oqýshylary úshin bólek bloktar salynǵan. Bilim ordasynda túrli sanattaǵy 100 muǵalim sabaq beredi.
Mektep aýmaǵynda arnaıy jabdyqtalǵan júgirý jolaǵy, basketbol, voleıbol oıyny jáne workout alańdary men tennıs korty bar. Al mektep ǵımaratynda sport zal, bastaýysh jáne joǵary synyp oqýshylaryna arnalǵan ashana, akt zal jáne kitaphana ornalasqan. Sondaı-aq jańa úlgidegi synyp, STEM, psıholog, logoped, medıtsına kabınetteri, fızıka, hımııa pánderi úshin zerthanalarmen qamtylǵan.
Eske sala ketelik, budan buryn Atyraýda «Jaıly mektep» jobasymen alǵashqy eki bilim ordasy ashylǵanyn jazǵan edik.