Jaıly mektep: Aqtóbede bir mekteptiń qurylysy múlde toqtap qaldy
AQTÓBE. KAZINFORM - Shalqar aýdany Bozoı aýylynda 300 oryndyq mektep qurylysy toqtap qaldy. Eger joba aıasynda qurylys jalǵaspaıtyn bolsa, jergilikti bıýdjetten qarjy bólinýi múmkin.
Aqtóbe oblysy boıynsha «Jaıly mektep» jobasy aıasynda 18 mektep salynýy tıis. Onyń 14-in bıyl qoldanysqa berý josparlanǵan. Qazirgi kezde Bozoıdaǵy mektep qurylysy toqtap tur. Tipti qurylys bul joba aıasynda jalǵaspaýy múmkin.
«Jeri berildi. Tegisteý, qazý jumysy bastalǵanymen qurylys jalǵaspady. Qujattarynda kemshilikter bolǵan sııaqty. Qazir qurylys tolyq toqtady. Oblystyq Qurylys, sáýlet jáne qala qurylysy, sonymen birge oblystyq bilim basqarmasymen birge 320 oryndyq mektepke ótinim berip otyrmyz. Buryn da 320 oryndyq mektep jobasy boldy ózimizde. Keler jylǵa ótinim berip otyrmyz», - dedi Shalqar aýdanynyń ákimi Janbolat Jıdehan.
Bozoıdaǵy mektep 1997 jyly salynǵan. Apatty dep tanylǵanyna 3 jyl boldy.
«Apatty degende qulap qalaıyn dep turǵan mektep emes. Jaryq paıda bolǵan jaǵyn bosatyp qoıdyq. Bir jaq qaptalynda jaryq bar. Qazir burynǵy balalar ınternat ǵımaratynda, mekteptiń bir bóliginde eki aýysymda oqyp jatyr. Onda 560 bala bar. Úsh jyldan beri solaı oqyp jatyr», - dedi Janbolat Jıdehan.
Eske salsaq, «Jaıly mektep» jobasy aıasynda salynatyn mekteptiń 13-i Aqtóbe qalasynda ornalasqan. Buǵan deıin habarlaǵanymyzdaı, keıbirinde jobasy qate bolyp shyqty. Jobalaýshylar jobany durys jasamaǵan soń saraptamadan óte almaǵan.
