Jaılaýdaǵy ómir: Qyrdyń kelini elsiz jerdegi tirshiligimen bólisti

ASTANA. KAZINFORM — Elmıra Maǵzomova 17 jyldan beri joldasymen jaılaýda turady. Qalada ósip, qyrǵa kelin bolǵan jeli juldyzy Jibek Joly arnasynyń «Búgin LIVE» baǵdarlamasyna qonaq boldy.

— Men Batys Qazaqstan oblysy, Oral qalasynda týyp-óstim. № 21 orys mektebin bitirdim. 11 jyl boıy qalada, oryssha bilim aldym. Shynymdy aıtsam, aýylda turamyn degen oı úsh uıyqtasam da túsime kirmeıtin. Biraq joldasymmen mektep bitirgennen keıin-aq bas qostyq, sóıtip 18 jasymda aýylǵa kelin bolyp tústim, — deıdi Elmıra.

Alǵashqy jyldary jas kelinge ońaı bolmaǵan.

— Qalada adamdardyń arasynda júrgen soń, aıdalada kórshisiz, jalǵyz úı bolyp turý maǵan qatty qıyn tıdi. «Qaıdan ǵana turmysqa shyqtym eken, oqýymdy jalǵastyryp júre turmadym ba?» dep jylaǵan kezderim de boldy. Biraq ýaqyt bárine úıretedi ǵoı. Qazir 17 jyl ótti. Qalanyń ystyǵyn asa saǵynbaımyn, kerisinshe aýyldyń tynyshtyǵyna, erkindigine baýyr basyp kettim. Búgin qalaǵa qaıta kósh dese, barmas edim, — deıdi ol.

Maǵzomovtar otbasynda kún tańǵy saǵat 6-dan bastalady.

— Qazir 12 sıyr saýyp otyrmyz. Olardyń barlyǵyn eshqandaı apparatsyz, qoldan saýý ońaı emes. Joldasym da qasymda kómektesedi. Sútti tartyp, súzbe, qaımaq, maı, qurt jasaımyz. Kúnimiz tańnan keshke deıin osy sharýamen ótedi. Kómekshi jaldaǵan emespiz, bárin ózimiz isteımiz, — deıdi stýdııa qonaǵy.

Keıipkerimizdiń balalary qalada oqıdy. Onda ata-enesi 5 nemeresin baǵyp otyr eken.

— Qala bizden bir saǵattyq jerde. Balalar sabaqtan bosasa, aýylǵa kelip, jumystyń bárine aralasady. Úlkenimiz kolledjde oqıdy, al kenjemiz bıyl 1-synypqa bardy. Jazda bárin eńbekke baýlımyz, — deıdi anasy.

Osydan 3 jyl buryn Elmıra áleýmettik jelide aýyl ómirin bólisýdi bastapty.

— Dalada jalǵyz úı bolǵan soń ish pysady. Sol úshin blog júrgizýdi bastadym. Sút ónimderin qalaı jasaıtynymdy túsirip júrdim. Bastapqyda jaı ǵana aralasý, pikir almasý úshin edi, keıin oqyrmandar kóbeıip ketti. Qazir ınstagramda 63 myńǵa jýyq adam bar, — deıdi ol.

Blog júrgizýdiń kásipke de paıdasy tıgen.

— Buryn qurt, sút ónimderin tek tanys-tamyrǵa ǵana satatynbyz. Qazir ónimderimizdi poshta arqyly Qazaqstannyń túkpir-túkpirine, tipti Parıj ben Anglııaǵa deıin jónelttik. Oqyrmandarymnyń arqasynda suranys artyp otyr, — deıdi «qyrdyń kelini».

Elmıranyń joldasy Áset aýyl tirligine de, áleýmettik jelidegi jumysqa da belsene aralasady.

— Vıdeoǵa túsýge áýesim joq. Kóbine Elmıra ózi túsiredi, keıde meni syrtymnan túsirip alady. Bizdiń sharýashylyq — otbasylyq is. Sıyr, qoı, jylqy ustaımyz. Men etin satamyn, áıelim sút ónimderin satady. Instagram paıda bolǵaly suranys eki ese artty, qazir úlgermeı jatatyn kezderimiz kóp, — deıdi Áset.

Ol otbasyndaǵy basty qundylyq — túsinistik pen qoldaý ekenin aıtady.

— Bizde áıeldiń jumysy, erkektiń jumysy dep bólinbeıdi. Barlyǵyn birge isteımiz. Qaı iste de kelisim men birlik bolsa, otbasy berekeli bolady. Elmıranyń paraqshasynyń atyn da men oılastyrdym. Basynda óz aty-jónin qoımaq boldy, biraq erekshelik kerek dedim. Sodan «qyrdyń kelini» degen ataý qalyptasty, — deıdi Elmıranyń joldasy.

Áset pen Elmıranyń balalary da aýyl tirshiligine jaqyn kórinedi.

— Úlken ulym sportqa beıim, biraq jazda mindetti túrde maldyń qasynda bolady. Óz erkimen maldy túgendep shyǵady. Eger balalardyń biri osy isti jalǵastyrsa, qýanamyz. Biraq kúshtemeımiz, — deıdi Áset.

Eske sala keteıik, buǵan deıin qazaq tilindegi Ýıkıpedııa mazmunyn baıytýǵa úles qosyp júrgen 10-synyp oqýshysy týraly jazǵan edik.