«Jaılaý» baǵdarlamasy arqyly mal sharýashylyǵy jobalaryna jeńildetilgen nesıe beriledi
ASTANA.KAZINFORM — Mal sharýashylyǵyn damytýdyń keshendi jospary aıasynda jaıylymdyq mal sharýashylyǵyn odan ári damytýǵa jáne elimizdiń azyq-túlik qaýipsizdigin nyǵaıtýǵa baǵyttalǵan «Jaılaý» jańa jeńildetilgen kredıttik ónim iske qosyldy. Bul týraly AShM málim etti.
«Jaılaý» baǵdarlamasy qýattylyǵy 300 bastan kem emes iri qara mal nemese 1000 bastan kem emes usaq mal ustaıtyn jańa mal sharýashylyǵy qojalyqtaryn qurýdy qoldaýǵa baǵyttalǵan. Baǵdarlamany júzege asyrý salanyń óndiristik ınfraqurylymyn nyǵaıtýǵa, mal sharýashylyǵy ónimderiniń óndiris kólemin arttyrýǵa jáne aýyldyq jerlerde qosymsha jumys oryndaryn ashýǵa múmkindik beredi.
«Jaılaý» baǵdarlamasynyń sharttary:
- jyldyq syıaqy mólsherlemesi – 6%-dan aspaıdy;
- kredıt berý merzimi – 10 jylǵa deıin;
- qarjylandyrý kólemi – iri qara mal ósirý jobalary úshin 350 mln teńgege deıin, usaq mal ósirý jobalary úshin 200 mln teńgege deıin.
Sonymen qatar, «Igilik», «Bereke» baǵdarlamalary jáne «Aınalym qarajatyn tolyqtyrý» baǵyty boıynsha jeńildetilgen qarjylandyrýdyń qoldanylý aıasy keńeıtildi. Endi bul baǵdarlamalar tek iri qara mal sharýashylyǵyn ǵana emes, qoı, jylqy, túıe, ara, maral sharýashylyqtaryn jáne shoshqa sharýashylyǵyn da qamtıdy.
«Igilik» jáne «Bereke» baǵdarlamalary joǵary ónimdi asyl tuqymdy mal satyp alýdy qarjylandyrý arqyly aýyl sharýashylyǵy taýaryn óndirýshilerdi qoldaýǵa arnalǵan. Osynyń barlyǵy aýyl sharýashylyǵy janýarlarynyń sanyn kóbeıtýge, tabyndardyń genetıkalyq áleýetin jaqsartýǵa, sondaı-aq mal sharýashylyǵy ónimderiniń ónimdiligi men óndiris tıimdiligin arttyrýǵa jol ashpaq.
«Igilik» baǵdarlamasynyń sharttary:
- 100 bastan ımporttyq iri qara maldy nemese 500 ımporttyq usaq maldy satyp alý;
- ımporttyq nemese otandyq asyl tuqymdy jylqy, túıe, maral, ara tuqymdaryn jáne shoshqa satyp alý;
- jyldyq syıaqy mólsherlemesi – 6%-dan aspaıdy;
- kredıt berý merzimi – 7 jylǵa deıin.
«Bereke» baǵdarlamasynyń sharttary:
- 500 bastan joǵary ımporttyq iri qara maldy nemese 1000 bastan joǵary ımporttyq usaq maldy satyp alý;
- jyldyq syıaqy mólsherlemesi – 6%-dan aspaıdy;
- kredıt berý merzimi – 7 jylǵa deıin.
Qarjylandyrý baǵyty men satyp alynatyn mal túrine qaraı negizgi qaryz ben syıaqyny óteý boıynsha 12 aıdan 30 aıǵa deıingi jeńildik kezeńi qarastyrylǵan.
«Aınalym qarajatyn tolyqtyrý» baǵyty boıynsha qarjylandyrý:
- jem-shóp pen jemdik qospalardy satyp alýǵa;
- janar-jaǵarmaı materıaldaryn alýǵa;
- qyzmetkerlerdiń eńbekaqysyn tóleýge;
- veterınarııalyq preparattardy satyp alýǵa;
- jem daıyndaý jáne taratý tehnıkasy men jabdyqtaryna arnalǵan qosalqy bólshekterdi satyp alýǵa beriledi.
Negizgi sharttary:
- jyldyq syıaqy mólsherlemesi – 5%-dan aspaıdy;
- kredıt berý merzimi – 12 aıǵa deıin.
Óńirlik áleýmettik-kásipkerlik korporatsııalardy (ÁKK) tartý arqyly qarjylandyrý arnalary keńeıtildi.
Jeńildetilgen baǵdarlamalarǵa qatysý sharttary týraly tolyq aqparat alý úshin aýyl sharýashylyǵy taýaryn óndirýshiler «Agrarlyq nesıe korporatsııasy» aktsıonerlik qoǵamynyń oblystyq fılıaldaryna jáne oblys ákimdikteri janyndaǵy óńirlik ÁKK-lerge júgine alady.
Buǵan deıin Qazaqstanda agrarshylardy jeńildetilgen qarjylandyrý kólemi edáýir artqanyn jazdyq. Jańa tetik arqyly aýyl sharýashylyǵy taýaryn óndirýshiler jyldyq 5 paıyzdyq mólsherlememen nesıe alyp, egis jáne egin jınaý jumystaryn ýaqytyly júrgizýge múmkindik aldy. Nátıjesinde qarjylandyrý kólemi men qamtylǵan egistik alqaptarynyń aýmaǵy ulǵaıdy.
