Jaıylymdyq ınfraqurylymdy damytý jeke baǵdarlama ázirlenbeıdi — Bektenovtiń senatorlarǵa jaýaby
ASTANA. KAZINFORM — Premer-mınıstr Oljas Bektenovtiń Senat depýtattarynyń jaıylymdyq ınfraqurylymdy damytý jónindegi jeke baǵdarlama ázirleý usynysyn jaýap berdi.
— Aýyl sharýashylyǵynda jer resýrstaryn tıimdi jáne utymdy paıdalanýdy qamtamasyz etý úshin Úkimet júıeli sharalar keshenin iske asyrýda. Atap aıtqanda, jaıylymdyq alqaptardy basqarý tásilderin jetildirý maqsatynda 2024 jylǵy aqpanda zańnamalyq túzetýler qabyldandy. Qoǵamdyq jaıylymdar uǵymy engizildi. Olardy paıdalanýǵa qoıylatyn talaptar kúsheıtildi. Jergilikti atqarýshy organdardyń jaıylymdardyń tozýyn boldyrmaý jónindegi is-sharalardy ázirleý jáne iske asyrý boıynsha ókilettikteri keńeıtildi, — dedi Úkimet basshysy.
Onyń aıtýynsha, atalǵan sharalar halyqty jaıylymdyq alqaptarmen qamtamasyz etý jáne olardyń sapalyq jaı-kúıin saqtaý jónindegi jumysty jandandyrýǵa múmkindik berdi.
— 2024 jylǵy shildede jaıylymdardy basqarý jáne olardy paıdalaný jónindegi úlgilik jospar bekitildi. Ol jaıylymdardy tıimdi paıdalaný jónindegi is-sharalardy, jaıylymdyq ınfraqurylym obektileri týraly málimetterdi, aýyl sharýashylyǵy janýarlaryn aıdap ótý úshin belgilengen servıtýttardy, shalǵaıdaǵy jaıylymdarda jaıýǵa arnalǵan mal basynyń sany týraly derekterdi, mádenı jáne arıdtik jaıylymdardy, orman jáne sý qorlarynyń jerlerin, erekshe qorǵalatyn tabıǵı aýmaqtardy paıdalaný erekshelikterin, usynylatyn jaıylym aınalymy shemalaryn jáne ózge de taldamalyq aqparatty qamtıdy, — dedi ol.
Premer-mınıstrdiń atap ótýinshe, 2025 jylǵy naýryzda úshinshi jáne tórtinshi deńgeıdegi bıýdjetter esebinen jaıylymdardyń tozýyna qarsy kúres jónindegi is-sharalardy qarjylandyrýdy kózdeıtin Bıýdjet kodeksi qabyldandy. Osyǵan baılanysty jergilikti atqarýshy organdar jaıylymdardy qalpyna keltirý jónindegi is-sharalardy derbes iske asyrý ókilettikterine ıe boldy.
— Bıyl 29 qańtarda Mal sharýashylyǵyn damytýdyń 2026-2030 jyldarǵa arnalǵan keshendi jospary bekitildi. Onda aýyl sharýashylyǵy janýarlarynyń sanyn kóbeıtý, olardyń ónimdiligin arttyrý jáne salanyń eksporttyq áleýetin keńeıtý, shalǵaıdaǵy mal sharýashylyǵy men jaıylymdyq ınfraqurylymdy kezeń-kezeńimen damytý, jaıylymdardy paıdalaný júıesin jańǵyrtý jáne memlekettik qoldaý kórsetý boıynsha nysanaly ındıkatorlardy belgileý kózdelgen. Osylaısha, qoldanystaǵy sharalar keshendi sıpatqa ıe. Soǵan baılanysty osy kezeńde jaıylymdyq ınfraqurylymdy damytý boıynsha jeke baǵdarlama ázirleý maqsatqa saı emes dep esepteledi, — dedi Oljas Bektenov.
Buǵan deıin Úkimet basshysy senatorlardyń orman qory jerlerin aýyl sharýashylyǵy maqsatyndaǵy jerler sanatyna aýystyrý usynysyna jaýap bergen edi.