Jaıylym tapshylyǵy eki esege azaıdy - AShM

ASTANA. KAZINFORM – 916,8 myń ga jaıylym rezervke qoıyldy. Bul týraly Aýyl sharýashylyǵy vıtse-mınıstri Azat Sultanov aıtty.

- Jergilikti atqarýshy organdar aýyl turǵyndaryn jaıylymmen qamtamasyz etý boıynsha aýqymdy jumystardy atqaryp jatyr. Máselen, 1 mln 124,6 myń gektar jaıylym halyqtyń malyn jaıý úshin ortaq paıdalanýǵa bekitildi. 723,1 myń gektar jaıylymǵa jer paıdalaný quqyǵy konkýrstyq negizde berildi. Eldi mekenderdiń shekarasy irgeles jatqan 79,4 myń gektar jaıylym jerimen keńeıtildi. 916,8 myń ga jaıylym rezervke qoıyldy, - dedi A. Sultanov Parlament Májilisinde «Jaıylym týraly» Zańynyń iske asyrylýyn talqylaý barysynda.

Onyń aıtýynsha, tıisti is-sharalar men mal basy boıynsha eseptik derekterdi qaıta qaraý nátıjesinde, eldegi jaıylym tapshylyǵy eki esege, ıaǵnı 8,4 mln gektardan 4,3 mln gektarǵa deıin azaıdy.

- Sonymen qatar, osy kúnge deıin memleket menshigine qaıtarylǵan 2 mln gektar jaıylym halyqtyń ortaq paıdalanýyna bekitildi, - dedi vıtse-mınıstr.

Eske salsaq, jaqynda jaıylymdy tozýdan qalaı saqtaýǵa bolatyny jaıynda jazǵan edik.

Buǵan deıin habarlanǵandaı, byltyr kúzde Strategııalyq josparlaý jáne reformalar agenttigi Kazinform saýalyna joldaǵan jaýapta eldegi mal sanyn qoldan kóbeıtip jazǵan óńirlerdi atady.