Jaıylym tapshylyǵy 3,5 mln gektarǵa deıin qysqardy – Úkimet

ASTANA. KAZINFORM - Paıdalanylmaı jatqan jerdi qaıtarý, mal basyn esepke alýdy naqtylaý, eldi mekenderdiń shekarasyn keńeıtý men ýchaskelerdi rezervteý esebinen jaıylym tapshylyǵy 3,5 mln gektarǵa deıin qysqardy.

Bul týraly vıtse-premer – ulttyq ekonomıka mınıstri Serik Jumanǵarınniń tóraǵalyǵymen ótken Jer resýrsyn utymdy paıdalanýdy baqylaý jónindegi respýblıkalyq komıssııanyń bıylǵy birinshi otyrysynda málims boldy.

Úkimettiń resmı saıtyndaǵy málimetterge qaraǵanda, otyrysta aýyl sharýashylyǵy vıtse-mınıstri Azat Sultanovtyń habarlaǵanyndaı, memleket menshigine 2,1 mln gektar paıdalanylmaǵan jáne zań buza otyryp berilgen jerler qaıtaryldy. 2026 jyly taǵy da 1 mln gektar jerdi qaıtarý josparlanyp otyr.

2026 jylǵy 1 qańtardaǵy jaǵdaı boıynsha qaıta bólingen jerlerdiń jalpy aýdany 8,5 mln gektar boldy, onyń ishinde:

- 2,8 mln gektar jer mal jaıý úshin halyqtyń jalpy paıdalanýyna berildi;

- 5,7 mln gektar jer aýyl sharýashylyǵy óndirisiniń sýbektilerine konkýrstyq negizde berildi.

2025 jyly komıssııa jumysyndaǵy negizgi rásimdik máseleler sheshildi. Jer paıdalanýshylardyń adaldyǵyn baǵalaý júıesi engizilip, vedomstvoaralyq ózara naqty is-qımyl merzimi belgilendi. Bul óńirlik komıssııalardyń jumysyn jedeldetýge jáne adal fermerlerdiń quqyǵyn qorǵaýdy kúsheıtýge múmkindik berdi.

Sondaı-aq, jerdiń degradatsııasymen, ıaǵnı sý jáne jel erozııasymen, shólge aınalýymen kúres jóninde, topyraqqa zertteý júrgizý boıynsha sharalar qabyldandy. Barlyq 17 oblysta óńirlik is-shara bekitildi. 2025 jylǵy ekinshi jartyjyldyqta jerdi jalǵa berý konkýrsyn ótkizý erejesi jańartyldy: endi ınvestıtsııa kólemi, tehnıka men maldyń bolýy, sondaı-aq mamandardyń biliktiligi mindetti krıterııge aınaldy.

Jaıylymdyq jerge erekshe nazar aýdarylady. 2025 jyly ákimdikter halyqtyń jalpy paıdalanýyna 1,3 mln gektar jaıylym jerdi bekitip berdi.

Retteýdiń negizgi quraly Jaıylymdardy basqarý jospary bolyp qala beredi. Elimizde barlyǵy 198 aýdan bar. Alaıda 2026 jyldyń basynda tek 157 jospar bekitilgen. Bul daladaǵy jaıylymdyq jerdi basqarýdyń tıimdiligin tómendetedi.

Mundaǵy jumysty jedeldetý qajettigi Mal sharýashylyǵyn damytýdyń 2026-2030 jyldarǵa arnalǵan keshendi josparyn júzege asyrýmen baılanysty kúsheıip, ol qujatta sýlandyrý arqyly jańa jaıylymdyq jerlerdi aıdalanýǵa berý kózdelgen.

Pılottyq joba retinde úsh aýdan anyqtaldy. Onda jaıylymdy basqarý jospary bekitilip, geobotanıkalyq zertteýler júrgizildi. Olardyń barlyǵynda da qalpyna keltirýdi qajet etetin degradatsııaǵa ushyraǵan jaıylymdyq jerderdiń edáýir úlken alqaptary anyqtaldy.

Oblys ákimdikterine aldaǵy aılarda qalǵan josparlardy bekitýdi aıaqtaý, shalǵaıdaǵy jaıylymdardy sýlandyrýdy, ınfraqurylymdy damytýdy basym baǵyt retinde qarjylandyrý jáne aınalymǵa jańa ýchaskelerdi qosýdy jedeldetý tapsyryldy.

Otyrys qorytyndysy boıynsha Serik Jumanǵarın Jer resýrstaryn basqarý komıtetine 2026 jyly 3,5 mln gektar jaıylym tapshylyǵy máselesin sheshýdi, olardyń maqsatty bekitilýin qamtamasyz etýdi jáne tozǵan jerdi qaıta egýdi bastaýdy tapsyrdy.

«Biz mal sharýashylyǵyn damytýdyń keshendi josparyn iske qosqanmen, jaıylym joq bolsa, ol jumys júrmeıdi. Memleketke qaıtarylǵan jerdi qur esepke alýdan paıda joq. Ol jaıylymǵa jaramdy bolýy kerek. Jaıylymdy qalpyna keltirý, kópjyldyq shópterdi qaıta egý mindeti bıyldyń ózinde sheshilýi tıis», - dep atap ótti vıtse-premer.

Osyǵan deıin bıyl shalǵaı jaıylymdardaǵy mal sharýashylyǵyna mamandanǵan 200 sharýashylyq qurylatyny týraly jazdyq.