Jaıyqty jaǵalaı ornalasqan aýyldarda tasqynǵa daıyndyq qalaı
ATYRAÝ.KAZINFORM – Atyraý oblysy Mahambet aýdanynda 17 eldimeken Jaıyq ózeniniń jaǵasynda ornalasqan. Búginde aýdan aýmaǵynda tasqynǵa daıyndyq bastalyp ketti.
Kópti Jaıyqtyń irgesinde otyrǵan Alǵa aýylyndaǵy jaǵdaı alańdatady. Sebebi, osydan 5 jyl buryn osy eldimekendegi 3,2 shaqyrym jaǵalaýdy bekitý jumysy bastalǵan. Alaıda bul jumys áli kúnge tolyq aıaqtalmady. Іstelgen jumys birneshe jyl qatarynan sý astynda qalǵan. Alǵashynda jobanyń quny 4,9 mlrd teńge boldy, keıin jobaǵa ózgeris engizilip 7,1 mlrd-qa jetti. 2025 jyly ózen arnasynyń báz qalpyna túsýin kútken merdiger bıyl jumysty jalǵastyrmaq. Mahambet aýdanynyń ákimi Qaırat Nurlybaevtyń aıtýynsha, osy jyly jaǵalaýdyń tómengi bóligi bekitilip, arnaıy plıtalar salynady.
- Bul jobaǵa ózgeris engizýge 1 jyldaı ýaqyt ketti. Oǵan sý kelgen kezde qurylys koordınatory ózgerýi sebep. Endi bul jobaǵa ózgeris enbeıdi. Sýdyń astynda qalady deıtin tómengi jumystyń kóbi oryndaldy. Qalǵanyn merdiger sý kelgenshe istese, plıtala salý syndy jumystarǵa kóshedi,-dedi aýdan ákimi Qaırat Nurlybaev.
Aıta keteik, alǵashynda bul joba 2024 jyldyń jazynda aıaqtalýy tıis edi. 2 jyl buryn aýyl halqy da, aýdan ákimdigi de merdiger mekeme jumys kestesinen keshigip jatqanyn málimdedi. Búginde aýdan ákimi Alǵa aýylyndaǵy jumysty osy jyly aıaqtaýdy josparlap otyr.
Budan bólek aýdan ortalyǵy Mahambet aýylynda 4,5 shaqyrymdyq jaǵa bekitilip jatyr. Jumystyń 90 paıyzy aıaqtalǵan. Ózen jaǵasyna jaıaý júrginshiler joly salynyp, kóshe shamdary ornatylýda. Bul jumys tolyǵymen jyldyń birinshi jartyjyldyǵynda aıaqtalady dep josparlanyp otyr.
Ótken jyly ákimdik Taldykól jáne Beıbarys aýylyndaǵy Jaıyq jaǵasyn bekitý úshin jobalaý jumysyn qolǵa alǵan edi. Qazirgi ýaqytta Taldykól aýylyndaǵy 1,7 shaqyrym bógetti nyǵaıtý jumysy bastalǵan. Bul jobanyń quny – 4,6 mlrd. Dál osyndaı qarjy qaralǵan jumysty Beıbarysta da bastap kózdelýde. Tender endi jarııalanbaq.
- Tasqynǵa qatysty alǵashqy boljamdar aqpan aıynyń ortasynan keıin bolady degen habar aldyq. Jalpy joǵarydan sý jiberilip jatyr degendi biz de estidik. Taǵy 3 aýyldyń bógetin nyǵaıtýdy josparlap otyrmyz. Saraıshyq aýylyndaǵy 800 metrge jasalǵan joba memlekettik saraptamada.Al Sarytoǵaı men Esbol aýyly boıynsha jobalyq-smetalyq qujat jasalyp jatyr. Bul aýyldarǵa arnalǵan jobalardy iske asyrýǵa qajetti qarjyny keler jyly suraıtyn bolamyz,-dedi aýdan ákimi Qaırat Nurlybaev.
Jalpy aýdan aýmaǵyndaǵy bógetterdiń ortasha bıiktigi 3 metrdi quraıdy. Dambylardyń bıiktigin tekserý jumysy júrip jatyr.
Osyǵan deıin Atyraý oblysy Jylyoı aýdanynda Jemnen keletin qaýipti azaıtý maqsatynda istelip jatqan jumys týraly jazǵan edik.
