Jaıyqtaǵy sý deńgeıi Taıpaq aýyly tusynda 940 santımetrden asty

ORAL. KAZINFORM – Batys Qazaqstan oblysynda Jaıyq ózenindegi sý deńgeıi Aqjaıyq aýdany Taıpaq aýylyndaǵy gıdrobekette 942 santımetrge jetti.

«Qazgıdromet» RMK BQO fılıalynyń 7 mamyr kúngi saǵat 08.00-degi málimetine qaraǵanda, ózen sýy Taıpaq tusynda bir táýlikte 13 santımetrge kóterildi.

Jaıyq ózeniniń Batys Qazaqstan oblysyndaǵy basqa gıdrobeketterinde sý deńgeıiniń túsýi jalǵasyp jatyr.

Aıtalyq, Báıterek aýdany ıAnvartsev aýylynda bir táýlikte 6 (790 sm), Oral qalasynda 2 (784 sm), Kóshimde 3 (806 sm), sondaı-aq Kóshim kanalynda 1 (752 sm) santımetrge tómendedi.

Aqjaıyq aýdanynyń ákimi Murat Serdalın jaǵdaıdyń qalypty, eldi mekenderge qaýip joq ekendigin jetkizdi. 

Aýdan turǵyndarynyń sózine qaraǵanda, saı-salany toltyryp jatqan mundaı mol sý kópten beri kelmegen.

Sonymen qatar maldy qaýipsiz jerge aıdap shyǵarý úshin jergilikti halyqqa tótenshe jaǵdaı qyzmetkerleri de kómektesip jatyr.

Eske sala keteıik, budan buryn Batys Qazaqstanda Jaıyq ózenindegi sý deńgeıi Taıpaq aýylynda 929 santımetrge jetkenin jazǵan bolatynbyz.