«Jaıyqmunaı» JShS 38 mlrd teńgeden astam qarjyny memleket esebinen qaıtaryp almaq bolǵan

Batys Qazaqstan oblysynyń prokýratýrasy JShS tekserý barysynda salyq zańnamasynyń talaptaryn buza otyryp, kompanııa 38 mlrd teńgeden astam qarajatty óteletin shyǵyndarǵa negizsiz jatqyzý faktilerine jol bergenin anyqtady, dep habarlaıdy Kazinform.

Oblys prokýratýrasynyń qadaǵalaý aktisi boıynsha kórsetilgen soma memleket óteıtin shyǵyndardan alyndy.

«Sondaı-aq, salyqtarǵa qosymsha esepteý júrgizilip, memleket kirisine 9,5 mlrd teńge óndirildi.

Salyq somasyn tómendetkeni úshin kompanııa aıyppul túrindegi ákimshilik jaýapkershilikke tartylyp, 2 mlrd teńge kóleminde aıyppul salynyp, tólendi.

Nátıjesinde oblys prokýratýrasy memlekettik bıýdjetti 11 mlrd teńgege tolyqtyrdy, sondaı-aq «Jaıyqmunaı» JShS 38 mlrd teńgeden astam shyǵyndaryn bıýdjetten negizsiz óteýge jol bermedi», — dep jazdy vedomstvodan.

Budan basqa, «Jaıyqmunaı» JShS-de transferttik baǵa belgileý máselesi boıynsha júrgizilgen tekserý nátıjeleri boıynsha salyq salý obektilerine túzetý júrgizildi, qosymsha esepteýge korporatıvtik tabys salyǵynyń jalpy somasy 725 mln teńgeni qurady, qazirgi ýaqytta óteý satysynda.