Jaıyq jaǵalaýyndaǵy jer daýy: kásipker men ákimdik arasyndaǵy tartys
ATYRAÝ. KAZINFORM – Atyraý qalasynyń ortalyǵynda ornalasqan «Aqjaıyq» qonaqúıiniń janynda gúl dúkeni bar kásipker Konstantın Şerbakov birneshe jyldan beri ákimdiktiń aýmaqty memleket muqtajdyǵyna alý týraly sheshimin túsinbeı dal.
Kásipkerge osy ýaqytqa deıin 1 300 sharshy metrdeı aýmaqty memleket muqtajdyǵyna alý týraly hat birneshe ret kelgen. Alǵash ret shamamen 2007 jyly, keıin 2019 jyly tirkelgen. Al sońǵysy 2024 jyldan beri jalǵasyp keledi. 2024 jyldyń sońynda «Aqjaıyq» qonaqúıiniń jańa ıesi aýmaqty satý týraly usynys bildirgen. Alaıda dúken ıesi nysandy satpaıtynyn málimdegen. 45 kúnnen keıin qala bıliginen aýmaqty memleket muqtajdyǵyna alý týraly hat kelgen.
– Konstıtýtsııa men Jer kodeksine sáıkes jerdi memleket muqtajdyǵyna alý úshin mindetti túrde dálel, zańdy negiz bolýy kerek. Jaı ǵana hat joldap, «alyp qoıamyz» deýge bolmaıdy. Al ákimdik dál solaı istedi. Eshbir qujatsyz, eshqandaı negizdemesiz alyp qoıý týraly hat jiberdi. Birde «turaq bolady» dedi, keıin «jol keńeıtiledi» dedi. Sebebi jańa kópir salynady-mys. Biraq tipti kópir salý úshin de jobalaýshy kompanııaǵa oblys ákimdigi naqty tehnıkalyq tapsyrma berýi tıis. Men bul suraqty ákimge qoıdym, biraq ol naqty jaýap bermedi, - dedi kásipker Konstantın Şerbakov.
Kásipkerdiń nysany Jaıyq ózeniniń jaǵalaýyna jaqyn, qalanyń qaq ortasynda ornalasqan deýge bolady. 2018 jyly órtke oranǵan «Aqjaıyq» qonaq úıin belgili bıznesmen Shota Abhazava satyp alyp, buzyp jatyr. Onyń ornyna bıiktigi 130 metr bolatyn, 5 juldyzdy qonaq úı – iskerlik ortalyq salmaq. Bul jobaǵa jaýapty kompanııanyń baspasóz qyzmeti qonaq úı jobasy gúl dúkenine tıesili jer ýchaskesine eshqandaı yqpalyn tıgizbeıtinin málimdedi.
– Bizdiń taraptan jerdi satyp alý týraly usynys boldy. Kelisim bolmaǵan soń bul taqyrypty jaýyp qoıdyq. Jergilikti ákimdiktiń ol aýmaqty memleket muqtajdyǵyna alý boıynsha jumysyna júrgiziletin jumysyna bizdiń kompanııanyń qatysy joq, - dep habarlady qonaq úı qurylysy jaýapty kompanııanyń baspasóz qyzmeti.
Bul máselege qatysty Atyraý qalasynyń ákimi Shákir Keıkınniń pikirin bildik. Ol bul aýmaq memlekettik jobany iske asyrýǵa qajet dep otyr.
– Memleket muqtajdyǵyna alý týraly shyqqan qaýlynyń ýaqyty aıaqtaldy. Biz jańa kópir salýdy josparlap otyrmyz. Joba boıynsha kópirdiń joly kásipkerlik sýbekti ornalasqan aýmaqqa tireleıin dep tur. Jáne jol keńeıtý máselesi týyndap otyr. Bul taqyryp áli talqylanyp jatyr. Aıta keteıin, jalpy kópir, magıstraldyq qubyrlar, jol salynatyn bolsa jerdi memleket muqtajdyǵyna alýǵa bolady,-dedi qala ákimi Shákir Keıkın.
Osy másele boıynsha kásipker Konstantın Şerbakovtyń shaǵymyn qalalyq prokýratýra qaraǵan. Quqyq qorǵaý organy jer ýchaskesin zańsyz májbúrlep ıelikten shyǵarý týraly ýáji dálel tapqanyn málimdegen. Osyǵan baılanysty Atyraý qalasynyń ákimdigine prokýrorlyq qadaǵalaý aktisi engizilipti.
Buǵan deıin Atyraýda qoldanystaǵy ortalyq kópirdiń qasyna jańasy salynýy múmkin ekenin jazǵan edik.