«Jaıyq» voleıbol klýby júldeli orynǵa talasa ala ma
Ótken jyly Ulttyq lıga komandalary qataryna qosylǵan «Jaıyq» voleıbol klýbynyń qazirgi betalysy qalaı? Bıyl quramy kúsheıtilgen «Jaıyq» el chempıonatynda júldegerler qatarynan kórine ala ma? Batys Qazaqstanda buryn bolǵan voleıbol dástúrin qaıta jańǵyrtý úshin ne isteý kerek? Osy oraıda Kazinform tilshisi sala mamandarymen tildesip, olardyń pikirlerin tyńdap kórdi.
Jaıyq» quramy qalaı jasaqtaldy?
Kezinde «Kondensat» dep atalǵan oraldyq komanda 2001 jyly Qazaqstan chempıony atandy. Odan keıin de klýb úzdik úshtiktiń qatarynan kórinip júrdi. Alaıda quryltaıshysy – «Kondensat» kompanııalar toby 2015 jyly qarjylandyrýdy toqtatqannan keıin komanda tarap ketti.
Onyń ornyn basady degen «Jaıyq» voleıbol klýby Joǵarǵy lıgadan asa almady. Tek ótken jyly ǵana «Jaıyq» qaıtadan qurylyp, Ulttyq lıga komandalary arasynda Qazaqstan chempıonatynda óner kórsete aldy.
«Jaıyq» voleıbol klýbynyń dırektory Azamat Nurmuhanbetovtiń málim etkenindeı, bıyl komanda quramynda eleýli ózgerister boldy.
Eń aldymen bas bapker retinde Oral voleıbolynyń túlegi Vıktor Kozık shaqyryldy. Ol kezinde oıynshy retinde Almatynyń «Dorojnık» klýbymen qatar kóptegen sheteldik komandada óner kórsetken. Sonymen qatar Qazaqstan, Reseı ǵana emes, Frantsııa klýbtaryn da jattyqtyrǵan bilikti maman.
«Komandaǵa Oral voleıbolynyń túlekteri Vıtalıı Vorıvodın, Vladımır Prokofev, Dmıtrıı Sergeev, lıbero Qaırat Baıbekovter qaıtyp oraldy. Sondaı-aq tájirıbeli legıonerler ıAroslav Ostrahovskıı, Egor Prozorov jáne Artem Kıselevpen tolyqtyrylǵan «Jaıyq» bıylǵy maýsymǵa tyńǵylyqty daıyndaldy. Bul óz jemisin berdi. Ulttyq lıga komandalary arasynda HHHІІ Qazaqstan chempıonatynyń Pavlodar qalasynda ótken birinshi týrynyń qorytyndysy boıynsha «Jaıyq» úzdikter qatarynan tabylyp, ázirge ekinshi orynda keledi. Bastapqy týrda komandadan Vladımır Prokofev úzdik dep tanyldy. Jergilikti oıynshylarǵa senim artýymyzdyń taǵy bir artyqshylyǵy, bul, ekinshi jaǵynan, qarjy únemdeýge múmkindik beredi. ıAǵnı olar úshin páter jaldaý qajet emes, Oraldaǵy óz úılerinde turady», - deıdi Azamat Madııaruly.
Onyń sózine qaraǵanda, Qazaqstan chempıonatynyń ekinshi týry 11-21 jeltoqsan aralyǵynda Taraz qalasynda ótedi. Alǵashqy týrdan keıin «Taraz» 17 upaımen kósh bastasa, «Jaıyq» (15 upaı) ekinshi, bıylǵy el chempıony «Pavlodar» (14 upaı) úshinshi orynda keledi. Ekinshi týrdaǵy oıyndardyń da tartysty ótetini anyq.
«Aldaǵy maqsat – osy bıikten tómendemeı, pleı-off kezeńine shyǵyp, Qazaqstannyń úzdik tórt komandasy qatarynan kóriný. Taǵy bir másele – qazirgi tańdaǵy myqty oıynshylarymyzdyń ornyn basatyn rezervti jasaqtaý. Qosalqy quramdar arasynda ótetin Qazaqstan chempıonatyna biz de qatysýdamyz. Mine, solardyń ishinde bolashaǵynan úmit kúttiretin jastarymyz bar. Tek olar sheberligin ushtap, ózderin jetildire berse, negizgi quramǵa qosylar edi», - deıdi klýb basshysy.
BQO voleıbol federatsııasynyń prezıdenti Tilepbergen Kaıýpov bıyl komandanyń sapalyq quramyn arttyrý baǵytynda tıisti ózgerister jasalǵanyn jetkizdi.
«Frantsııada jattyqtyrýshy bolyp, biliktiligin kórsete bilgen Vıktor Kozık «Jaıyqty» jańa bıikke kóteredi dep úmittenemiz. Sondaı-aq taǵy bir oraldyq, osyǵan deıin tórt ret Qazaqstan chempıony, Azııa klýbtyq birinshiliginiń eki márte úzdik oıynshysy atanyp úlgergen Vıtalıı Vorıvodın sııaqty tájirıbeli voleıbolshylar komandany alǵa súıreri anyq. Sondyqtan jańa maýsymda úzdik úshtikke iligýdi kózdep otyrmyz», - dep naqtylady T. Kaıýpov.
Komandany qarjylandyrý qandaı deńgeıde?
BQO dene shynyqtyrý jáne sport basqarmasynyń basshysy Jeńis Nyǵmetýllınniń aıtýynsha, «Jaıyq» voleıbol klýbyna bıyl 283,8 mln teńge bólindi.
«2022-2023 jylǵy maýsymnyń qorytyndysy boıynsha komanda Ulttyq lıgada jetinshi orynnan kórindi. Bul, árıne, tómen kórsetkish. Munyń sebebi – klýbtyń on jylǵa jýyq ýaqyt boıy QR Ulttyq lıgasyna qatyspaı, eldegi negizgi jarystan tys qalǵany. Aldaǵy ýaqytta sonyń orny tolady dep esepteımiz», - deıdi J. Nyǵmetýllın.
«Komandaǵa qaralǵan qarjy kólemi kóbeıtildi. Klýbtyń 2024 jylǵy bıýdjeti 450 mln teńge kóleminde bolmaq. Sportshylardy qoldaý, voleıboldy odan ári damytý baǵytyndaǵy jumystar júıeli túrde júrgiziletin bolady», - dep nyqtady T. Kaıýpov.
A.Nurmuhanbetov «Jaıyqtyń» qarjylandyrylýy jaqsy deńgeıde, bul jóninen Ulttyq lıgadaǵy segiz komandanyń ishinde shamamen altynshy orynda ekenin aıtty.
Taǵy bir mańyzdy másele - komandanyń talapqa saı keletin zalmen qamtylýy.
«Ulttyq lıga talaptaryna sáıkes keletin Oralda jalǵyz zal bar, bul – «Oral» sport klýby. Sonda jattyǵýlarymyzdy ótkizýdemiz. Komanda barlyq kerekti qural-jabdyqtarmen qamtamasyz etilgen», - deıdi klýb jetekshisi.
Óńirdegi sport janashyrlary «Jaıyq» voleıbol klýbyna osylaı kóńil bólinip otyrǵanyna rıza ekenin aıtady.
«Kondensat» tarap ketkennen keıin Oral voleıbolynyń túlekteri basqa klýbtarǵa aýysty. Bári de qarajatqa baılanysty. Endi, mine, ótken jyldan bastap komanda tizginin Azamat Nurmuhanbetov syndy kásipqoı voleıbolshylar ustap, bıyl Vıktor Kozıkteı bilikti jattyqtyrýshy, Qaırat Baıbekov, Vıtalıı Vorıvodın, Vladımır Prokofevteı óz oıynshylarymyz qaıta oralyp jatsa, nege qýanbasqa! Ótken jyldan bastap ózi de voleıbolshy Tilepbergen Kaıýpov federatsııa basshylyǵyna kelgennen keıin jaǵdaı jaqsardy. Qazir «Jaıyq» voleıbol klýby ǵana emes, oqýshylar men jastar lıgalaryna, ardagerlerge de barynsha qoldaý kórsetilip jatyr. Osy betburys aldaǵy ýaqytta da jalǵassa, sportshylarymyz el chempıony atanatynyna senim mol», - deıdi voleıbol ardageri Qambar Sálimov.
Ulttyq lıga oıyndary Oralda óte me?
Batysqazaqstandyq jankúıerlerdiń Ulttyq lıga oıyndaryn tamashalaýdan qol úzip qalǵanyna on jyldaı ýaqyt ótti. Ádette Ulttyq lıgada óner kórsetetin komanda bir týrdyń básekelerin óz alańynda ótkizedi. Mundaı múmkindik «Jaıyqqa» berile me?
A.Nurmuhanbetov 10-20 qańtar aralyǵynda 3-týr oıyndaryn ótkizýge Qazaqstan voleıbol federatsııasyna ótinim bergenin jasyrǵan joq.
«Áıtse de Oraldaǵy zal bir talapqa saı kelmeıdi. Keminde 500 adam otyratyn minber bolýy kerek. Degenmen federatsııa bizdi qoldaıdy dep oılaımyz. Sosyn «Qazsport» telearnasy tarapynan qoıylatyn talaptar bar, ony da ázirge sheshe almaı jatyrmyz», - deıdi klýb dırektory.
Oral qalasynda turatyn sport ardageri Telman Ǵusmanov osyndaı jarystardy kózbe-kóz kórýdiń ózi, ásirese, jankúıerler úshin úlken qýanysh syılaıtynyn bildirdi.
«Men ózim Jánibek aýdanynda týyp-óstim, sonda sport salasynda uzaq jyl eńbek ettim, basshylyq qyzmetter atqardym. 1968 jyly mektep oqýshylary arasynda jarys bolyp, qazirgi P.Atoıan atyndaǵy stadıonda aǵash eden ústinde oınaǵanymyz esimde. Qazir jaǵdaı múldem basqa ǵoı, jańadan sport saraılary salynyp jatyr. Sonyń ózinde jattyǵatyn oryn jetpeı jatady. Ardager voleıbolshylar úshin de arnaıy keste jasalyp, bizdiń sportpen etene shuǵyldanýymyzǵa múmkindik berilse degen oıym bar. Sosyn aýyl voleıbolyna kóbirek kóńil bólinse eken. Kezinde bir ǵana Jánibekten ótken ǵasyrdyń alpysynshy jyldary Bazarbaı Sıǵalıev, Zolıa Shamelov, ıÝrıı Zýbkov, Ǵumar Іzbasov, Amangeldi Jamashevtar oqýshylar arasynda oblysta aldyńǵy orynnan kórinip júrdi. Keıin Ánýar Absalıamov, Madııar Nurmuhanbetov, Sergeı Pogýlskıı sekildi sheber oıynshylar shyqty. Mine, izdese, durys jolǵa qoısa, qaladan da, aýyldan da el namysyn abyroımen qorǵaı alatyn jas talanttar tabylady», - deıdi T. Ǵusmanov.
Qoryta aıtqanda, voleıbol mamandary men sport sarapshylary, jankúıerler «Jaıyq» voleıbol klýbynyń bolashaǵyna senetinin bildirdi. Bıyl bastalǵan chempıontattyń jańa maýsymynda batysqazaqstandyq komanda júldege ilige ala ma, ony ýaqyt kórsetedi.
Eske sala keteıik, budan buryn «Aqjaıyq» dopty hokkeı klýbynyń bolashaǵy qandaı bolatyny jóninde jazǵan edik.
