«Jaıyq» voleıbol klýby qatarynan toǵyz matchta jeńiske jetti

PAVLODAR. KAZINFORM - Pavlodar qalasynda voleıboldan erlerdiń ulttyq lıga komandalary arasynda ótip jatqan Qazaqstan chempıonatynyń ekinshi týrynda ortalyq kezdesý Oraldyń «Jaıyǵy» men «Jetisý» (Taldyqorǵan) arasynda boldy.

Buǵan deıin Vıktor Kozık jattyqtyratyn oraldyqtar 25 upaımen kósh bastasa, jetisýlyqtar (24 upaı) da qalyspaı kele jatqan edi. 

«Jaıyq» sapynda komanda kapıtany Vıtalıı Vorıvodın, Vladımır Prokofev, Vıtalıı Erdshteınderge qosa ýkraınalyq Volodımır Kovalchýk (baılanystyrýshy), reseılikter Mıhaıl Morov, Borıs Fıstıýlevter alańǵa shyqty. Lıbero Sergeı Okýnev te qosylyp otyrdy.

«Jetisýdyń» bas bapkeri Marat Adryshev Aıbek Jaqsylyqov, Rýstam Gılıazýtdınov, reseılikter Denıs Gorbachev, Vladıslav Spırın sııaqty oıynshylarǵa senim artty.

Alǵashqy eki partııada batysqazaqstandyqtar sheberlikteriniń basym ekendigin dáleldedi – 25:20, 25:19. Degenmen úshinshi sette taldyqorǵandyqtar tegeýrindilik tanytty – 25:23. Biraq tórtinshi partııada «Jaıyq» oıyn tizginin qaıta qolyna ala bildi. Bastapqyda V.Erdshteın dopty sátti bergen kezde olar 7:3 esebimen alǵa ketti. Aqyry osy basymdylyqtan aıyryla qoıǵan joq – 25:21. 

Qorytyndy esep – 3:1, «Jaıyqtyń» paıdasynda.

Osylaısha, qatarynan 9 matchta jeńisti ýysynan shyǵarmaǵan oraldyqtar upaı sanyn 28-ge jetkizdi.

Erteńgi, sońǵy kúngi oıynǵa qatyspaıtyn «Jetisý» quramynan D.Gorbachev ekinshi týrdaǵy úzdik oıynshy atandy. 

Almatynyń «Býrevestnık» komandasy búgin «Esildi» 3:0 (25:22, 25:22, 25:16) esebimen súrindirip, 19 upaımen týrnır kestesinde besinshi orynǵa kóterildi.

Eske sala keteıik, budan buryn voleıboldan kósh sońyndaǵy komandanyń el chempıonyn utqanyn jazǵan bolatynbyz.