«Jaıyq» voleıbol klýby chempıondyq ataǵyn saqtaý úshin baryn salady – bapker
ORAL. KAZINFORM – Voleıboldan erlerdiń ulttyq lıga komandalary arasynda HHHIV Qazaqstan chempıonatynyń alǵashqy kishi týry 7-9 qazanda Oral jáne Túrkistan qalalarynda ótedi. Jańa maýsym qarsańynda Kazinform tilshisi el chempıony – «Jaıyq» voleıbol klýbynyń bas bapkeri Vıktor Kozıkke birneshe saýal qoıǵan edi.
— Vıktor ıÝrevıch, jańa maýsymǵa daıyndyq qalaı júrgizildi?
— Bıyl Qazaqstanda úzdik shyqqannan keıin Maldıv araldarynyń astanasy Male qalasynda ótken Ortalyq Azııa chempıondar lıgasynda jeńimpaz atandyq. Sodan soń bárimiz demaldyq.
Voleıbolshylardyń alǵashqy toby 18 tamyzda jattyǵýdy bastady. 25 tamyzda biz de qosyldyq. Oıynshylar ádettegideı medıtsınalyq baqylaýdan ótip, densaýlyqtaryn qalpyna keltirýmen aınalysty. Sozylmaly jaraqattar da boldy. Ortalyq Azııa chempıonatynda úzdik oıynshy atanǵan Vıtalıı Erdshteınge ota jasaldy. Qazir qalpyna kelý ústinde. Taıaýda sapqa tura ala ma, kóremiz.
«Atyraý» komandasymen eki ret joldastyq kezdesý ótkizdik. Esep — 1:1.
Ózimizdiń qalamyzdaǵy «Jaıyq arena» sport kesheninde ótetin bastapqy týrǵa barynsha ázirmiz dep aıta alamyn.
— «Jaıyq» voleıbol klýbynyń quramynda qandaı ózgerister boldy?
— Qazaqstandaǵy bolashaǵy bar jas oıynshylardyń biri — Klım Rıýhovpen kelisim-shartqa qol qoıdyq. Qazir ol jaǵajaı voleıbolynan ótetin álem chempıonatyna daıyndalýda.
Sondaı-aq jas voleıbolshylardyń ishinen úsheýin erekshe atap ótýge bolady. Atap aıtqanda, ortalyq oıynshy Arnur Shaıdolla, ekinshi qarqyndaǵy Danııl Sýharev, shabýylshy Mansur Іzbasarovqa úmit arta alamyz. Kúni búgin olar 14 oıynshynyń qatarynda sheberligin shyńdaýda.
Komandada qos birdeı tájirıbeli baılanystyrýshymyz bar ekenin aıtqym keledi. Ýkraınalyq Volodımır Kovalchýk «Jaıyqta» qalsa, Almatynyń «Býrevestnıginen» Sergeı Kýznetsov alyndy.
Mıhaıl Morov «Atyraýǵa» aýyssa, taǵy bir reseılik Borıs Fıstıýlev Ázerbaıjan klýbymen kelisim-shartqa qol qoıdy.
Basqa voleıbolshylarymyz óz ornynda qaldy.
— Chempıon bolýdan góri sol ataqty saqtap qalý qıyn dep jatady. Bul jóninde ne aıtar edińiz?
— Árıne, óte qıyn. Óıtkeni komandalar chempıonǵa qarsy básekede baryn salady. Basqa klýbtardyń quramy da kúsheıtildi. Bizdiń aldaǵy maýsymdaǵy maqsatymyz ózgergen joq, qalaıda júldeli orynnan kórinýdi kózdeımiz.
«Jaıyqtyń» ulttyq lıgada sátti óner kórsetýine baılanysty Batys Qazaqstanda jaqsy serpilis paıda boldy. Bul bizdiń baǵytymyzdyń durys ekendigin kórsetedi. Ol úshin oblys jáne qala basshylyǵyna alǵysymdy bildirgim keledi.
Birinshilikke qosa Qazaqstan kýbogynyń fınalynda jáne «Jaıyq arenada» ótetin sýper kýbok oıynynda jeńiske jetsek deımiz.
Eger reglament ózgermese, aldaǵy jyly mamyr aıynda Indonezııada ótýi tıis Azııa chempıondar lıgasynda el namysyn qorǵaımyz. Onda qurlyqtyń segiz úzdik komandasy synǵa túsedi. Sonyń ishinde Japonııa men Irannyń myqty klýbtary bar.
— «Jaıyqpen» birge Qazaqstan ulttyq quramasyn da jattyqtyryp kelesiz. Onyń aldynda qandaı mindetter tur?
— Ol jóninde aıtý ázirge erterek. Degenmen Qazaqstan jastar quramasy 21 jasqa deıingiler arasynda alǵash ret álem chempıonatyna qatysyp, úzdik 16 komandanyń qataryna kirgeni belgili.
Sondyqtan Qazaqstan voleıbol federatsııasy bapkerlik shtabpen birge ulttyq quramaǵa jastardy kóbirek tartpaqshy. Mundaı qadam bolashaq úshin de kerek.
— Áńgimeńizge rahmet. Aldaǵy maýsymda sáttilik tileımin.
Eske sala keteıik, budan buryn bapkerdiń voleıbol deńgeıin kóterý úshin týǵan jerine oralǵany jóninde aıtqanyn jazǵan bolatynbyz.
Sondaı-aq «Jaıyq» komandasy voleıboldan Qazaqstan chempıony atandy.
Oraldyń «Jaıyq» klýby Ortalyq Azııa chempıonatynda top jardy.