Jaıyq ózeniniń jaǵasyn bekitýge kishkentaı atyraýlyqtar kómektesip júr

ATYRAÝ. KAZINFORM – Atyraý oblysynda Jaıyq ózeniniń jaǵasyn bekitýge úles qosýǵa umtylǵan turǵyndar qatary kóbeıdi. Olardyń arasynda kishkentaı balalar da bar.

Oblystyq jedel shtabtyń málimetinshe, Jaıyq ózeni Atyraý qalasyndaǵy jaǵalaýy 105 sektorǵa bólingen.

«Qazir munaıly shahar men onyń mańyndaǵy ýchaskelerde bóget salý jumysy táýlik boıy atqarylyp jatyr. Bul jumysqa mekemelerden 2 225 qyzmetker men 3 354 erikti, 800 arnaıy tehnıka tartyldy», - dep habarlady jedel shtabtan. 

Áleýmettik jelide qapqa topyraq salyp turǵan balalar týraly vıdeo júkteldi. Vıdeo Atyraý qalasyndaǵy «Avangard» shaǵyn aýdanynda túsirilgen.

Jaǵany bekitýge kómektesý úshin bir otbasynyń eki balasy anasymen birge kelgen. Qapty ashyp otyrǵan Ámınanyń jasy 9-da eken. Al, 5 jasar Aldııar kúrekpen topyraq salyp tur. 

Jaıyq jaǵalaýynda úlkenderge kómektesip júrgen balalar az emes. Bári de «Avangard» shaǵyn aýdanynda turady. 

«Mine, bizdiń elimizge jany ashıtyn kishkentaı batyr qyzdarymyz. Úlkender, balalar, bári jumylyp jumys istep júr. Jaraısyńdar!», - deıdi vıdeo avtory. 

Eske sala ketelik, budan buryn Jaıyq ózeniniń Kaspıı teńizine quıar saǵasyn tereńdetý bastalǵanyn habarlaǵan edik.