Jaıyq ózeniniń sýy Atyraý qalasyna qaı tustan kirýi múmkin

ATYRAÝ. KAZINFORM – Atyraý oblysynyń ákimi Serik Shápkenov Jaıyq ózeniniń sýy Atyraý qalasyna qaı tustan kirýi múmkin ekenin aıtty.

Oblys ákiminiń aıtýynsha, Inder, Mahambet aýdandary men Atyraý qalasy tasqyn sý basý qaýpi bar aımaqqa jatady.

«1994 jylǵy sý tasqynynan beri 30 jyl ótti. Qazir aldymen naqty myna aýyldy sý basady dep aıta almaımyz. Sý múldem kútpegen jaqtan kelýi múmkin. Qazir Inder, Mahambet aýdandary men Atyraý qalasy sý basý qaýpi bar aımaqtarǵa jatady. 1994 jylǵy derekterge súıenetin bolsaq, tasqyn sý Atyraý qalasyna Besikti jáne Damby aýyldary arqyly kirýi múmkin», - dedi Serik Shápkenov.

Onyń aıtýyna qaraǵanda, Jaıyq ózeninde geodezııalyq zertteýler júrgizilip jatyr. Mamandar qaýipti ýchaskelerdi anyqtaıdy. Sol tustardy boılaı jaǵalaýdy bekitý jumystaryn júrgizý, bógetter salyp, dambylardy bekitý qajet bolady.

«Sýdyń qaýpin durys baǵalaý kerek. Onyń aldyn bógeýden eshqandaı paıda joq. Sýdy Kaspıı teńizine quıatyndaı burý qajet», - dep málim etti Serik Shápkenov.

Eske sala ketelik, buǵan deıin Atyraý oblysynda tótenshe jaǵdaı jarııalanǵan bolatyn.

Sondaı-aq, Atyraý oblysynyń ákimi Serik Shápkenov turǵyndar ómirine qaýip tónse, aldyn ala habarlanatynyn aıtty.