Jaıyq ózeniniń Oral qalasy tusyndaǵy deńgeıi 755 santımetrge jetti
ORAL. KAZINFORM — Jaıyq ózeniniń Oral qalasy tusyndaǵy deńgeıi bir táýlikte 12 santımetrge kóterildi.
«Qazgıdromet» RMK BQO fılıalynyń dırektory Tilegen Shapanovtyń 14 sáýir kúngi saǵat 08.00-degi málimetine qaraǵanda, ózen deńgeıi 755 santımetrge (qaýipti shegi – 850 sm) jetti.
Jaıyq deńgeıi Báıterek aýdany ıAnvartsev gıdrobeketinde 1 santımetrge (803 sm, qaýipti deńgeıi – 1 250 sm) tómendegenimen, basqa tustarda joǵarylaǵany baıqalady. Aıtalyq, Oraldan basqa Kóshim aýyly tusynda ózen deńgeıi 739 (+21 sm), Taıpaqta 448 (+8) santımetrdi kórsetti.
Oǵan qosa Kóshim kanalyndaǵy sý deńgeıi 4 santımetrge ósip, qaýipti shekten (800 sm) 7 santımetrge asyp ketti.
Sondaı-aq Báıterek aýdanynda Rýbejka ózenindegi sý deńgeıi 816 santımetr (+7, qaýipti shegi – 1000 sm) boldy.
Oblystyń basqa ózenderinde sý deńgeıi túsken.
Batys Qazaqstanda sý tasqynyna qarsy kúres jalǵasýda.
Eske sala keteıik, budan buryn BQO polıtseılerine Shymkentten gýmanıtarlyq kómek jetkizilgenin jazǵan bolatynbyz.
