Jaıyq ózeniniń Kaspııge quıar jeriniń 3 shaqyrymy qaıta qazylmaq
ATYRAÝ.KAZINFORM – Bıyl Jaıyq ózeniniń Kaspıı teńizine quıar jerin qazý jumystary jalǵasady. 2024 jyldan beri qazylǵan 13 shaqyrymnyń úsh shaqyrymy byltyr sýdyń laılanýyna baılanysty bitelip qalǵan.
Jalpy bul jumys 2024 jyly ór sýyn kedergisiz teńizge jiberý maqsatynda qolǵa alynǵan edi.
Oblystyq ákimdik sala mamandarymen aqyldasyp, bul jumysty joba-smetalyq qujatsyz bastap ketken. Mundaı sheshimge oblys ákiminiń tapsyrmasy jáne óńirde tótenshe jaǵdaı jarııalanýy sebep bolypty.
2024 jyly tereńdetý jumysy atqarylǵan. Byltyr jospar boıynsha barlyǵy 13 shaqyrym bolatyn aýmaq 3 metrge deıin tereńdetilýi tıis edi. Eni 20 metr. Bul jumys atqarylǵan, alaıda 3 shaqyrymdy topyraq qaıtyp basyp qalǵan. Atalǵan iske jaýapty oblystyq qurylys, sáýlet jáne qala qurylysy basqarmasynyń basshysy Nurbergen Qusaıynovtyń aıtýynsha, túp tereńdetýdiń nátıjesinde teńiz tamaǵynda jasandy kanal paıda boldy.
— Sol kezde Kaspıı teńiziniń deńgeıi kóterilgenmen, jalpy jylma jyl teńiz tartylyp bara jatyr. Jaıyq ózeniniń kanalyn soza berýge týra kelip tur. Túp tereńdetý jumysy arqyly qazylǵan topyraq bir jaǵyna jınaldy. Eki jaǵyna shyǵarsa ony sý shaıyp ketý qaýpi bar. Sol sebepti bir jaǵyna bal soǵý arqyly kanaldy tereńdetý jumystaryn júrgizdik. Onyń nátıjesin ótken jyly halyq kórdi dep oılaımyn. Óıtkeni, teńizden balyq keldi, teńizge shyǵyp jatqan arnaıy kemeler bar. Soǵan múmkindik jasaldy. Byltyr jumys teńiz jaǵynan toqtady. Oǵan jyldyń sońynda aýa raıynyń ózgerip, qatty tolqyn men kúnniń salqyndaýy sebep. Ótken jyly sýdyń laılanýyna baılanysty 3 shaqyrymy bitelip qalǵan edi. Sol jumysty keri istep, merdiger mekeme bıyl aıaqtap beredi, — dedi oblystyq qurylys, sáýlet jáne qala qurylysy basqarmasynyń basshysy Nurbergen Qusaıynov.
2024 jyly merdigerge mekemege avans retinde tek 700 mln teńge tólengen. Byltyr merdigerge bir tıyn da berilmepti. Jobalyq smetalyq qujat jyldyń sońyna deıin sozylǵan. Jalpy joba quny 2 mıllıard teńgege jýyqtaıdy.
Osyǵan dıin Kazgıdromet mekemesiniń boljamynsha Kaspıı deńgeıi 2050 jylǵa qaraı 5,5 metr tómendeýi múmkin ekenin habarlaǵan edik.