Jaıyq ózeniniń Kaspıı teńizine quıar saǵasyn tereńdetý jumystary áli aıaqtalǵan joq
ATYRAÝ. KAZINFORM – Atyraýda Jaıyq ózeniniń Kaspıı teńizine quıar saǵasyn tereńdetý jumystary áli jalǵasyp jatyr.
Atyraý oblysynyń jedel shtabynan málim etkendeı, bul jumysty atqarý úshin bas merdigerlikke «PavlodarÓzenPorty» AQ tańdalǵan.
«Mol sýdyń kelýine baılanysty Jaıyq ózeniniń Kaspıı teńizine quıar saǵasynyń 48,9-50,5 shaqyrymynyń aralyǵynda túp tereńdetý jumysy júrgizilip jatyr. Tereńdetiletin aýmaqtyń uzyndyǵy – 1600, eni – 20, al, tereńdigi 1,2 metrdi quraıdy. Qazir tereńdetý jumysyna «ZRS-G», «Vatermaster-1», «Vatermaster-2» snarıadtary tartylǵan. Búgin, 3 maýsymdaǵy málimetke sáıkes, «Qazaqstan sý joldary» RMQK-nyń tapsyrysymen 2 myń 643 metr aýmaq tereńdetildi. Sý aıdynynyń túbinen 16 myń 686 tekshe metr topyraq alyndy», -dep habarlady oblystyq jedel shtab.
Sondaı-aq, «DM EKO KASPIAN» JShS Jaıyq ózeniniń Kaspıı teńizine quıar saǵasynda 2 myń 350 metr aýmaqta tereńdetý jumysyn júrgizgen.
Eske sala ketelik, buǵan deıin Jaıyq ózeniniń Kaspıı teńizine quıar saǵasy 1,5 metrge tereńdetilgenin habarlaǵan bolatynbyz.
