Jaıyq ózeniniń Kaspıı teńizine quıar saǵasyn tereńdetý bastaldy
ATYRAÝ. KAZINFORM – Jaıyq ózeniniń Kaspıı teńizine quıar saǵasynyń túbin tereńdetý bastaldy.
Atyraý oblystyq qurylys basqarmasynyń basshysy Nurbergen Qusaıynovtyń aıtýynsha, ózen saǵasyn tereńdetý jedeldetilgen tártippen júrgiziláp jatyr.
«Maqsatymyz – Jaıyq ózeniniń sýyn Kaspıı teńizine quıylý aǵysyn arttyrý. Qazir ózenniń teńizge quıar saǵasy óte tereń emes. Qazirgi tereńdigi nebári – 40-50 sm, eni – 20 metr. Tereńdetý jumysy aıaqtaǵannan keıin ózen saǵasynyń tereńdigi 2 metrge deıin jetedi. Bul ózenge keletin mol sýdyń Kaspııge quıylý aǵysyn arttyrady», - dedi Nurbergen Qusaıynov.
Onyń aıtýyna qaraǵanda, ózen saǵasyn tazartý, tereńdetý keńeıtý úshin eki ekskavator qoldanylady. Sondaı-aq, aldaǵy ýaqytta osyndaı jumystardy atqarýǵa tıimdiligi joǵary «Amfıbııa» ekskavatory jumysqa tartylady.
Eske sala ketelik, budan buryn Serik Shápkenov Jaıyq ózeniniń sýy Atyraý qalasyna qaı tustan kirýi múmkin ekenin aıtqan bolatyn.
Sondaı-aq, Atyraýda Bereke, Almaly, Besikti aýyldaryn sý basýy múmkin ekenin jazǵan edik.
