Jaıyq ózeniniń deńgeıi Taıpaq aýyly tusynda 750 santımetrge jetti

ORAL. KAZINFORM – Jaıyq ózenindegi sý deńgeıi Aqjaıyq aýdany Taıpaq aýyly tusynda bir táýlikte 51 santımetrge kóterildi.

«Qazgıdromet» RMK BQO fılıalynyń 2 mamyr kúngi saǵat 08.00-degi málimeti boıynsha atalmysh gıdrobekette sý deńgeıi 750 santımetrge jetti (qaýipti shegi – 850 sm).

Esesine Jaıyq deńgeıi Báıterek aýdany ıAnvartsev aýylynda bir táýlikte 7 (820 sm, qaýipti shegi – 1 250 sm), Oralda 7 (813 sm, 850 sm), Kóshimde 6 (827 sm, 850 sm) santımetrge tómendedi.

Kóshim kanalynda sý deńgeıi 1 santımetrge (816 sm, qaýipti sheginen 16 santımetrge artyq) tústi.

Aqjaıyq aýdanynyń ákimi Murat Serdalın Jaıyq sýy qarqyndy kelip, Aqsýat, Almaly, Taıpaq aýyldarynyń tusynan ótip jatqanyn jetkizdi.

Aýdandaǵy «Jaıyqtehservıs» MKK dırektory Tımýr Myrzaǵalıevtiń aıtýynsha, Jaıyq boıynda ornalasqan sý uńǵymalaryn sý basýyna baılanysty aýyldarǵa aýyz sý tasymaldanýda.

«Uńǵymalardy sý basý qaýpi tónýine baılanysty sý jınap alý jóninde aýyldyq okrýgterge aldyn ala eskertildi. Qazirgi tańda Moıyldy, Іlbishin, Aqsýat, Atameken, Qaraýyltóbe, Bazartóbe aýyldaryna sý tasymaldanady. Oblystan sý tasıtyn kólikter kele jatyr. Búgin-erteńnen bastap okrýgterge bólinedi», dedi T.Myrzaǵalıev.

Eske sala keteıik, budan buryn Batys Qazaqstanda Kóshim kanalynda sý deńgeıi qaıta kóterilgenin jazǵan bolatynbyz.

Dýlat Maqatov eldiń uıymshyldyǵy sý tasqyny kezinde aıqyn kóringenin aıtty.