Jaıyq ózeniniń deńgeıi Inderde — 707, Mahambet aýdanynda 770 santımetrge jetti

ATYRAÝ. KAZINFORM — Atyraý oblysynda Jaıyq ózenindegi sý deńgeıi kóterilip jatyr. Búgin keshki saǵat 20:00–de ózen sýy Inder aýdanynda 707, al, Mahambet aýdanynda 770 santımetrge jetti.

Atyraý oblysynyń jedel shtabynan málim etkendeı, búgin, 30 sáýirde Jaıyq ózeniniń sýy edeýir kóterilgen.

Máselen Inder aýdanynda tańerteńgi 08:00–de sý deńgeıi 693 santımetrdi quraǵan.

Al, keshki saǵat 20:00–ge deıin 14 santımetrge kóterilip, 707 santımetr boldy. 

Mahambet aýdanynda da osyndaı ahýal qalyptasyp otyr.

Munda tańerteńgi saǵat 08:00–de Jaıyqtyń deńgeıi 764 santımetr edi. Keshki saǵat 08:00–de 770 santımetrge jetti. 

Jaıyq ózeni Atyraý qalasynyń tusynda da kóterildi. Búgin tańerteńgi saǵat 08:00–de sý deńgeıi 446 sm bolatyn.

Endi 12 saǵattyń ishinde 3 sm-ge kóterilip, 449 sm boldy. 

«Inder, Mahambet aýdandarynda Jaıyq ózeniniń qaýipti deńgeıi — 850 sm. Al, Atyraý qalasynda 550 sm qaýipti deńgeı sanalady», -dep habarlady oblystyq jedel shtabtan.

Eske sala ketelik, buǵan deıin Jaıyq ózeniniń sýy Mahambet aýdanynda 7,5 metrge jetkenin jazǵan edik.