Jaıyq ózeniniń deńgeıi Inderbor kentinde shekti deńgeıden 114 santımetrge asyp ketti

ATYRAÝ. KAZINFORM – Atyraý oblysynda Jaıyq ózeniniń sýy áli kóterilip jatyr. Búgin sý arnasynyń deńgeıi Inderbor kentinde shekti deńgeıden 114 santımetrge asyp ketti.

Atyraý oblysynyń jedel shtaby Jaıyq ózenindegi sý deńgeıiniń búgin, 8 mamyrda tańerteńgi saǵat 08:00-degi málimetin usyndy.

«Jaıyq ózenindegi sý deńgeıiniń bir táýlikte Inder aýdanynyń ortalyǵy – Inderbor kentinde + 37 santımetrge kóterildi. Búgingi sý deńgeıi – 959 sm. Bul shekti deńgeıden +114 santımetrge kóp», -dep habarlady oblystyq jedel shtabtan.

Sondaı-aq, Mahambet aýdanynda ózen arnasy keshe tańerteńnen beri +15 santımetrge ulǵaıǵan. Búgin tańerteńgi saǵat 08:00-de Jaıyqtyń sýy Mahambet aýylynyń tusynda 893 santımetrge jetti. Munda shekti deńgeı – 850 sm.

Al, Atyraý qalasyndaǵy gıdrobekette sý deńgeıi 515 santımetrdi kórsetip tur. Shahar aýmaǵyndaǵy qaýipti shek 550 sm deńgeıinde belgilengen.

Búgin Jaıyq ózeniniń sýy munaıly shahar mańyndaǵy Jańatalap aýylynda 368, Erkinqala eldi mekeninde 328 santımetrdi qurady.

Eske sala ketelik, budan buryn Jaıyq ózenindegi sý deńgeıi Inder aýdanynda 900 santımetrge jetkenin habarlaǵan edik.