Jaıyq ózeniniń deńgeıi Atyraý tusynda da tómendeı bastady
ATYRAÝ. KAZINFORM – Jaıyq ózeniniń sýy Atyraý qalasynyń tusynda da tómendeı bastaǵany tirkelip otyr.
Atyraý oblysynyń jedel shtabynan málim etkendeı, Jaıyq ózeniniń deńgeıi Inder men Mahambet aýdanynda kún saıyn tómendep jatyr.
Búgin, 3 maýsymda tańerteńgi saǵat 08:00-de Inderbor kentindegi gıdrobekette ózen sýy 6 santımetrge tómendegen. Bul kentte Jaıyq sýynyń deńgeıi 9 metr 29 santımetr boldy. Munda qaýipti shek – 845 santımetr. Demek, qaýipti shekten áli de 84 santımetrge artyq bolyp tur.
Mahambet aýdanynda da Jaıyq arnasy birneshe kún qatarynan tómendep keledi. Búgin sý deńgeıi 5 santımetr azaıdy. Qazir Mahambet aýylynyń tusynda 10 metr 6 santımetr boldy.
Jaıyq ózeni Atyraý qalasynyń aýmaǵynda da tómendeı bastady. Munda birneshe kún 6 metr deńgeıinde saqtalyp turdy. Ózen arnasy 1 maýsymda keshki mezgilden beri tómendegeni baıqaldy.
Qazir munaıly shahardaǵy gıdrobekettegi sý deńgeıi – 5 metr 97 santımetr. Sondaı-aq, Jańatalap jáne Erkinqala aýyldarynda Jaıyq ózeni kóterilgen joq.
Eske sala ketelik, budan buryn Jaıyq ózeniniń deńgeıi Inder men Mahambette tómendep, Atyraýda kóterilmegenin habarlaǵan bolatynbyz.
