Jaıyq ózeninen Atyraý mańyndaǵy Sokolok kanalyna sý kele bastady

ATYRAÝ. KAZINFORM – Jaıyq ózeninen Atyraý mańyndaǵy Sokolok kanalyna sý kele bastady. Atyraý oblysynda Jaıyq ózeninen bastaý alatyn 15 magıstraldy kanal bar. Sonyń biri – Atyraý qalasynyń mańyndaǵy Sokolok kanaly.

Oblys ákiminiń tapsyrmasymen Jaıyq ózeniniń sýyn osy kanal arqyly Kaspıı teńizine burý josparlanyp otyr. Bul kanaldyń negizgi uzyndyǵy – 32 shaqyrym.

Kanaldyń tabanyn tazalaý, jaǵalaýyn bekitý jumystarynyń úılestirýshisi Oljas Sultanovtyń málimetine súıensek, Sokoloktyń sý ótkizý qýaty sekýndyna 100 tekshe metrdi quraıdy.

«Basty maqsat – Jaıyq ózeniniń Atyraý qalasyna qaraı aǵatyn mol sýyn azaıtý. Osy maqsatta munaıly shahardy aınalyp ótetin Sokolok kanalynyń múmkindigin paıdalaný kózdeldi. Óıtkeni, bul kanal Jaıyq ózeni men Kaspıı teńiziniń aralyǵyn jalǵastyryp jatyr. Bul – kanaldyń basty ereksheligi. Bastapqy josparǵa sáıkes qoldanystaǵy kanaldyń jaǵalaýyn bekitýdi qolǵa aldyq. Keıin jaǵdaıdy zerdelep, eskisimen qatarlastyryp, jańa kanal qazý týraly sheshim qabyldandy. Sebebi eski kanaldyń kóp jeri batpaq, tehnıkanyń jumysyna qıyndyq keltirdi», - deıdi Oljas Sultanov.

Onyń aıtýyna qaraǵanda, jańa kanaldyń jaǵalaýyna barlyq standartqa sáıkes nyǵyzdalǵan bóget turǵyzylǵan. Bógettiń bıiktigi – Baltyq mejesi boıynsha 21 metr. Al eńis tustardyń bárine geodezııalyq ólshem júrgizilip, arnaıy belgimen rettelgen.

«Atyraý-Dossor jolyndaǵy kópirge deıingi bóget kóterildi. Sokolok kanalynyń túbi tereńdetilip, tazartyldy. Jańadan qazylǵan uzyndyǵy 24 shaqyrymdyq kanal daıyn», - dedi Oljas Sultanov.

Búgin, 24 sáýirde Sokolok kanalyna sý keldi. Qazir kanaldaǵy sý deńgeıi 5 santımetrge kóterilgen.

Eske sala ketelik, budan buryn Atyraýǵa tasqyn sýdyń kóp bóligi mamyr aıynyń basynda kelýi múmkin ekenin habarlaǵan bolatynbyz.