Jaıyq ózenine mol sý kelse, balyq qorynyń kóbeıýine yqpal etedi

ATYRAÝ. KAZINFORM – Jaıyq ózenine mol sý kelse, balyq qorynyń kóbeıýine yqpal etedi. 

«Balyq sharýashylyǵy ǵylymı-zertteý ınstıtýty» JShS Atyraý fılıalynyń dırektory Erbolat Qadımovtyń aıtýynsha, sońǵy úsh jylda Jaıyq ózenindegi sý deńgeıine udaıy zertteý júrgizilgen.

«Zertteý nátıjesinde 2019-2022 jyldary Jaıyq ózeniniń Atyraý qalasy aýmaǵyndaǵy bóliginde sý deńgeıiniń óte tómen bolǵany anyqtaldy. Bul jaıt balyq qorynyń kóbeıýine keri áserin tıgizdi. Balyq sharýashylyǵy salasyn damytýǵa sý aıdyndaryndaǵy ahýaldyń septigi bar. Sol sebepten, bıyl Jaıyq ózenine mol sý kelse, balyq popýlıatsııasyna, ýyldyryq shashý úrdisine oń áser etedi dep esepteımiz», - deıdi Erbolat Qadımov. 

Onyń pikirinshe, sý aıdynynda aǵys ulǵaıǵan saıyn balyq qory molaıa túsedi. Sondaı-aq, rusat etilgen merzimde aýlanatyn balyq ta kóbeıedi.

Eske sala ketelik, buǵan deıin Atyraýǵa tasqyn sýdyń kóp bóligi mamyr aıynyń basynda kelýi múmkin ekenin habarlaǵan bolatynbyz.