Jaıyq ózenine erekshe memlekettik mártebe qashan beriledi
ASTANA. KAZINFORM – Sý resýrstary jáne ırrıgatsııa vıtse-mınıstri Nurlan Aldamjarov Májiliste ótip jatqan Úkimet saǵatynda Jaıyqtyń nege áli kúnge deıin erekshe memlekettik mańyzy bar ózen-kólder qataryna qosylmaı jatqanyn túsindirdi.
- Jaıyq ózenin erekshe memlekettik mańyzy bar sý nysandarynyń tizimine qashan qosasyzdar, - dep surady Dúısenbaı Turǵanov.
Nurlan Aldamjarovtyń aıtýynsha, vedomstvo mamandary Jaıyqtyń mártebesin aıqyndaý usynysyn ǵylymı turǵyda negizdep úlgermeı jatyr.
- Jaıyq ózenine aıryqsha mártebe berý týraly qaýly jobasyn daıyndaǵanbyz. Biraq bir-eki zertteý qajet bolǵandyqtan negizdeme jasaý úshin másele sheshimin tappaı jatyr. Alaıda qazir Jaıyq sýyn tıimdi paıdalanýdyń jol kartasy aıasynda zertteýler aıaqtalýǵa jaqyn qaldy. Geografııa jáne sý qaýipsizdigi ınstıtýty jasap jatyr. Sonyń negizinde Jaıyqqa erekshe qorǵalatyn sý nysandarynyń tizine engizemiz, - dedi vıtse-mınıstr.
Aıta ketý kerek, Kaspıı máselesin sheshý aıasynda Qazaqstan Reseıge Edil sýyn birlesip retteý týraly usynys jasamaqshy.