Shekaralas elderden sý kelý qaýpi joq – QR TJM
ASTANA. KAZINFORM – Sý tasqyny bastalǵaly beri Azamattyq qorǵanys qyzmetteri 97 071 adamdy, onyń ishinde 32 735 balany qaýipsiz jerlerge jetkizdi. Bul týraly QR TJM Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash baıandady.
Ýaqytsha ornalasý pýnkterine 7 606 adam, onyń ishinde 3 728 bala ornalasty.
«Tótenshe jaǵdaılar, Qorǵanys mınıstrligi jáne Ulttyq ulannyń áýe kemeleri qutqarý jumystaryn jalǵastyrýda. Qostanaı, Atyraý, Batys Qazaqstan, Aqtóbe oblystaryna avtokólikpen 893 500 keli gýmanıtarlyq kómek kórsetildi. Sondaı-aq áýe kemelerimen Batys Qazaqstan, Aqtóbe, Qostanaı, Atyraý, Qaraǵandy jáne Abaı oblystaryna 177 635 keli gýmanıtarlyq kómek jetkizildi», - dedi E. Saıpash Ortalyq kommýnıkatsııalar qyzmetinde ótken baspasóz máslıhatynda.
Avarııalyq-qutqarý jumystarynda 25 myńǵa jýyq adam jáne 3 myńnan astam tehnıka, 15 áýe kemeleri jumyldyryldy.
«Shekaralas memleketterdiń aýmaqtarynan sý basý qaýpi joq. RF Orynbor oblysynyń Orsk qalasynda bolǵan jaǵdaı men Batys Qazaqstan oblysy aýmaǵyndaǵy Jaıyq ózenindegi sý deńgeıiniń kóterilýi baqylaýymyzda», - dedi spıker.
Eske sala keteıik, buǵan deıin Batys Qazaqstanda sý basqan jerlerde ishek aýrýlary tirkelmegenin jazǵan edik.
