Jaıyq ózenindegi sý deńgeıi: joǵarydan keler qaýip bar ma

ORAL. KAZINFORM – Batys Qazaqstan oblysynda Jaıyq ózenindegi sý deńgeıi sońǵy kúnderi túsip kele jatqany baıqalady.

«Qazgıdromet» RMK BQO fılıalynyń 13 mamyr kúngi saǵat 08.00-degi málimeti boıynsha Jaıyqtaǵy sý deńgeıi Báıterek aýdany ıAnvartsev aýyly men Oral qalasy tusynda bir táýlikte 4 (754 sm), Kóshimde 2 (778 sm) , Taıpaqta 5 (927 sm) jáne Kóshim kanalynda 1 (744 sm) santımetrge tómendedi. Esesine kórshiles Reseıdiń Orynbor oblysynda Orsk qalasy tusynda Jaıyq ózenindegi sý deńgeıi azdap óskeni baıqalady.

«Ózenderdiń aǵysy solaı, birde kóteriledi, birde túsedi. Odan Batys Qazaqstan oblysyna keler qaýip joq», - dedi fılıal dırektory Tilegen Shapanov.

«Qazsýshar» RMK Batys Qazaqstan fılıalynyń basshysy Raýan Husaıynovtyń naqtylaýynsha, reseılikterden alynǵan málimetke qaraǵanda, Jaıyq ózenindegi sý deńgeıi Orsk qalasy tusynda bir táýlikte 3 santımetrge (343 sm) kóterilse, Orynborda 17 santımetrge (548 sm) túsken.

«Bul Orynbor oblysyndaǵy Irekli sý qoımasynan Jaıyq ózenine sýdyń jiberilý kólemine baılanysty. Aýa raıynyń ózgerýine baılanysty 7 mamyrdan bastap Irekli sý qoımasynan Jaıyq ózenine jiberiletin sý kólemi sekýndyna 192 tekshe metrge deıin kóbeıtildi. 8 mamyr kúni tańmen Jaıyq deńgeıi Orynborda 640 (qaýipti shegi – 760 sm), Elek aýyly tusynda 840 (850 sm) santımetrdi kórsetti. Degenmen 12 mamyrdan bastap Irekliden jiberiletin sý kólemi sekýndyna 141 tekshe metrge deıin azaıtyldy. Sonyń áserinen Orynborǵa qosa Elekte búgin tańmen sý deńgeıi 820 santımetrge deıin tústi», - dedi R.Husaıynov.

Eske sala keteıik, budan buryn Batys Qazaqstanda Jaıyq ózeninde 7 adamnyń qutqarylǵanyn jazǵan bolatynbyz.