Jaıyq ózenindegi sý deńgeıi Mahambet aýdanynda 10 metrden tómen tústi

ATYRAÝ. KAZINFORM – Búgin Jaıyq ózenindegi sý deńgeıi Mahambet aýdanynda 10 metrden tómen tústi. Ózen arnasy Inder aýdany men Atyraý qalasynda da tómendep jatyr. 

Atyraý oblysynyń jedel shtabynan málim etkendeı, sý arnasynda birneshe kúnnen beri tómendeý kórsetkishi tirkelip otyr. Máselen, búgin, 6 maýsymda Jaıyqtyń deńgeıi túski saǵat 12:00-de Inderbor kentiniń tusynda 9 metr 8 santımetr bolǵan. Biraq áli de qaýipti shekten 63 santımetrge kóp. 

Dál osy ýaqytta Mahambet aýdanyndaǵy deńgeıi 9 metr 99 santımetrdi qurady. Demek, bul aýdanda Jaıyqtyń sýy 10 metrden tómen tústi. Degenmen, munda da qaýipti shekten 1 metr 49 santımetrge artyq bolyp tur. 

Jaıyq ózeniniń sýy Atyraý qalasynda da tómendeı bastaǵaly birneshe kún ótti. Qazir shahardaǵy deńgeıi – 5 metr 93 santımetr. Munaıly shahar tusynda qaýipti shek 5 metr 50 santımetr ekenin eskersek, ázirge 43 santımetrge asyp turǵanyn baıqaımyz. 

Búgin tańerteń ózen arnasy Atyraý qalasynyń mańyndaǵy Jańatalap aýylynda – 2, al, Erkinqala aýylynyń tusynda – 1 santımetrge azaıǵan. Osylaısha, óńirdegi nazarǵa alynǵan gıdrobekettiń bárinde Jaıyq ózenindegi sý deńgeıiniń tómendegeni tirkeldi. 

Eske sala ketelik, budan buryn Atyraý oblysynda Jaıyq ózenindegi sý tasqyny sharyqtaý sheginen ótkenin habarlaǵan bolatynbyz. 

Alaıda, keshe Atyraýda tasqyn sý 100 metrge jýyq bógetti shaıyp ketti.