Jaıyq ózenindegi sý deńgeıi Inder aýdanynda 900 santımetrge jetti

ATYRAÝ. KAZINFORM – Atyraý oblysynyń Inder aýdanynda Jaıyq ózenindegi sý deńgeıi 900 santımetrge jetti. 

Oblystyq jedel shtabtyń málimetine súıensek, búgin keshki saǵat 20:00-de Jaıyq ózeniniń sýy taǵy da kóterilgen. 

«Jaıyq ózeni Inder aýdanynyń ortalyǵy – Inderbor kentiniń tusynda tańerteńigi saǵat 08:00-den beri +16 santımetrge kóbeıdi. Qazirgi sý deńgeıi – 900 sm. Qaýipti deńgeıden +55 santımetrge asty», - dep habarlady oblystyq jedel shtabtan. 

Sý deńgeıi Mahambet aýdanynda +7 santımetrge ulǵaıyp, 868 santımetrge jetken. Bul aýdanda ózen arnasy qaýipti deńgeıden +18 santımetrge asyp tur. Al, Atyraý qalasynyń tusynda Jaıyq deńgeıi 501 santımetr qurady. Shaharǵa jaqyn ornalasqan Jańatalap eldi mekeninde 360, Erkinqala aýylynyń tusynda 320 sm boldy.

Eske sala ketelik, búgin tańerteń Jaıyq ózeniniń deńgeıi Inderde – 884, Mahambet aýdanynda 861 santımetr bolǵan edi. Sondaı-aq Inder aýdanyndaǵy on bes evakýatsııa pýnktinde 1 600 oryn baryn habarlaǵan bolatynbyz.