Jaıyq ózenindegi muzdy jarý jumystary bastaldy

ATYRAÝ.KAZINFORM — Jaıyq ózeninde muz jarý jumysy júrip jatyr. Naqtyraq aıtqanda, «ARKTOS» úlgisindegi amfıbııalyq keme 6-shy kanal men teńiz tamaǵynyń aralyǵynda júr.

Jaıyq-Kaspıı oblysaralyq basseındik balyq sharýashylyǵy ınspektsııasy búgin NCOC kompanııasy qysqy kezeńde avarııalyq-qutqarý jumystaryn júrgizý maqsatynda sý, muz jáne qurlyq jaǵdaıynda júre keme jumysyn bastaǵanyn málimdedi.

Bul jumys Kaspıı teńizi deńgeıiniń tómendeýine jáne taıaz ýchaskelerdiń ulǵaıýyna baılanysty tótenshe jaǵdaılar kezinde jedel áreket etý múmkindigin qamtamasyz etý úshin qolǵa alynǵan.

— Jumystar Jaıyq ózeniniń saǵasy aýdanynda jáne D. araly mańyndaǵy Kaspıı teńizi akvatorııasynda júrgiziledi. Qozǵalys baǵyty ekologııalyq talaptardy qatań saqtaı otyryp uıymdastyrylady. Prımorsk kanaly arqyly ótý qarastyrylmaǵan. Qaýipsizdik sharalaryn balyq sharýashylyǵy ınspektsııasy men shekara qyzmeti baqylaýda ustaıdy, -dep málimdedi ınspektsııa.

Qys mezgilinde Jaıyq ózeninde qalyń muz ben qardyń túsýine baılanysty sýdaǵy otteginiń azaıý qaýpi týyndaıdy. Osyǵan baılanysty amfıbııalyq kemelerdiń júrý marshrýty boıynsha muz jarý jumystary júrgizilip, balyqtar men basqa da sý janýarlarynyń jappaı tunshyǵýynyń aldyn alýǵa múmkindik beredi.

Osyǵan deıin Irekli qoımasynan Jaıyq ózenine jiberiletin sý kólemi ulǵaıtylǵanyn habarlaǵan edik.