Jaıyq ózenindegi mol sý Sokolok kanalymen Kaspıı teńizine quıylady

ATYRAÝ. KAZINFORM – Atyraý oblysynda Jaıyq ózeniniń mol sýy Sokolok kanalymen Kaspıı teńizine quıylady. 

Jaıyq ózenine mol sý áli kelip jatyr. Soǵan baılanysty Atyraý qalasy men oǵan irgeles ornalasqan eldi mekenderdi tasqyn sýdan qorǵaý úshin eki kanalǵa mańyz berildi. Sonyń biri – Sokolok kanaly. Atyraý oblysy ákiminiń tapsyrmasymen Jaıyq ózeniniń sýyn osy kanal arqyly Kaspıı teńizine burý josparlandy.

Bul kanaldyń negizgi uzyndyǵy – 32 shaqyrym. Kanaldyń tabanyn tazalaý, jaǵalaýyn bekitý jumystarynyń úılestirýshisi Oljas Sultanovtyń málimetine súıensek, Sokoloktyń sý ótkizý qýaty - sekýndyna 100 tekshe metr.

«Sý tasqynyna daıyndyq kezinde Jaıyq ózeninen bastaý alatyn kanaldarǵa mańyz berildi. Ásirese, Atyraý qalasyna qaraı aǵatyn mol sýdy azaıtý úshin Sokolok kanalynyń múmkindigin paıdalaný kózdeldi. Óıtkeni, bul kanal munaıly shahardy aınalyp ótip, Jaıyq ózeni men Kaspıı teńiziniń aralyǵyn jalǵastyrady. Bul – Sokolok kanalynyń basty ereksheligi. Bastapqy josparǵa sáıkes qoldanystaǵy kanaldyń jaǵalaýyn bekitý qolǵa alyndy. Keıin jaǵdaıdy jete zerdelep, eskisiniń janynan jańa kanal qazý týraly sheshim qabyldandy. Sebebi eski kanaldyń kóp jeri batpaq, tehnıkanyń jumysyna qıyndyq keltirdi», - deıdi Oljas Sultanov.

Onyń aıtýynsha, jańa kanaldyń jaǵalaýyna barlyq standartqa sáıkes nyǵyzdalǵan bóget turǵyzyldy. Bógettiń bıiktigi – Baltyq mejesi boıynsha 21 metr. Al eńis tustardyń bárine geodezııalyq ólshem júrgizilip, arnaıy belgimen rettelgen.

Atyraý oblysy jedel shtabynyń aqparatyna qaraǵanda, Sokolok kanalynyń boıynda táýliktik kezekshilik qoıylǵan. Ótken aptada jaýǵan jańbyrdan keıin úsh ýchaskede bógetti nyǵaıtý jumysy júrgizildi. Oǵan 47 adam, 36 tehnıka tartyldy.

Eske sala ketelik, budan buryn Atyraýda tasqyn sýdyń ortasynan 80 jylqy qaýipsiz aýmaqqa shyǵarylǵanyn jazǵan edik.