Jaıyq ózeni Oral qalasy tusynda 10 metrge kóteriledi - feık
ORAL. KAZINFORM - Áleýmettik jelilerde aýdıojazba arqyly 5 sáýirde Jaıyq ózeniniń deńgeıi 10 metrge kóteriletini týraly habar taralyp jatyr. "Qazgıdromet" RMK BQO fılıalynyń dırektory Tilegen Shapanov bul aqparattyń jalǵan ekendigin aıtty.
Onyń sózine qaraǵanda, Orynbor oblysyndaǵy Irıkla sý qoımasynan mol sý jiberilip jatqany ras. Biraq Jaıyq sáýirdiń ekinshi jartysynda ǵana óziniń qaýipti shegi - 850 santımetrge jetýi múmkin.
"Qazirgi ýaqytta Jaıyq deńgeıi Oral qalasy tusynda 600 santımetrge jetti. Saǵat saıyn ózen sýy 2-3 santımetrge joǵarylaýda. Sondyqtan turǵyndardyń tek resmı aqparatqa senýin suraımyz", - dedi T.Shapanov.
Sonymen qatar Oral qalasy ákimdigi shaharǵa Jaıyqpen mol sý kólemi taıaý ýaqytta kelýi yqtımal ekendigin eskertti. Mundaı jaǵdaıda ózen jaıylmalarynda ornalasqan saıajaı úıleri men ǵımarattarǵa qaýip tónedi. Sol sebepti ózen jaıylmalarynda turatyn turǵyndar kúni buryn qaýipsiz jerge kóshýi qajet.
Eske sala keteıik, budan buryn Orynbordaǵy Irıkla sý qoımasynan sekýndyna 1600 tekshe metr sý jiberilip jatqanyn jazǵan bolatynbyz.
