Jaıyq ózeni erekshe memlekettik mańyzy bar sý nysandarynyń tizimine engizildi
ASTANA.KAZINFORM - Sý resýrstary jáne ırrıgatsııa mınıstri Nurjan Nurjigitov Atyraý qalasynda Parlament Senatynyń tóraǵasy Máýlen Áshimbaevtyń tóraǵalyǵymen ótken Qazaqstan Respýblıkasynyń Ornyqty damýy salasyndaǵy ulttyq maqsattar men mindetterdiń iske asyrylýyn monıtorıngileý jónindegi Parlamenttik komıssııanyń XII otyrysyna qatysty.
Sý sharýashylyǵy vedomstvosynyń basshysy baıandamasynda Ornyqty damý maqsattaryna qol jetkizý aıasynda transshekaralyq Jaıyq ózeni basseınindegi sý resýrstaryn tıimdi basqarý baǵytynda atqarylyp jatqan jumystar týraly aıtty.
Jańa Sý kodeksiniń talaptaryn iske asyrý sheńberinde Jaıyq ózeni erekshe memlekettik mańyzy bar sý nysandarynyń tizimine engizildi. Sonymen qatar Qazaqstandaǵy segiz sý sharýashylyǵy basseıniniń árqaısysy boıynsha, onyń ishinde Jaıyq-Kaspıı basseıni úshin de sý resýrstaryn qorǵaý jáne paıdalaný jónindegi basseındik josparlar ázirlenip jatyr. Bul qujattarda sý sharýashylyǵy balansy, qoljetimdi sý kólemderi, sý resýrstaryn bólý tártibi, sondaı-aq sý tapshylyǵy qaýpin jáne sý tasqyny men qurǵaqshylyq saldaryn azaıtýǵa baǵyttalǵan sharalar qamtylǵan.
Basseındik josparlar negizinde sý resýrstaryn keshendi basqarýdyń Bas jospary ázirlenedi. Bul qujat memlekettik josparlaý júıesiniń mańyzdy elementine aınalady.
Sonymen qatar ınfraqurylymdyq jobalar júzege asyrylyp jatyr. Ózenniń sý ótkizý qýatyn arttyrý maqsatynda Jaıyq ózeniniń jalpy uzyndyǵy 52 shaqyrymdy quraıtyn tórt ýchaskesinde túbin tereńdetý jáne tazalaý jumystary júrgizilýde. Al balyqtardyń ýyldyryq shashýyna qolaıly jaǵdaı jasaý úshin Qıǵash ózenindegi Ganıýshkın jáne Jarkósin kanaldarynyń túbi tereńdetilip jatyr.
Sý salasyn damytýdyń keshendi josparyna sáıkes, Atyraý oblysynda jergilikti atqarýshy organdar onnan astam kanaldy kúrdeli jóndeýden ótkizýdi josparlap otyr. Sondaı-aq jalpy sany 21 myń adam turatyn toǵyz aýyldyq eldi mekendi sapaly aýyz sýmen qamtamasyz etý úshin «Keregen-Saǵyz-Jamansor» jáne «Taısoǵan-Mııaly» toptyq sý qubyrlaryn rekonstrýktsııalaý jumystaryn aıaqtaý kózdelgen.
— Óńirde júrgizilip jatqan jumystar Jaıyq-Kaspıı sý sharýashylyǵy basseınindegi ekologııalyq jaǵdaıdy jaqsartýǵa, Qazaqstannyń sý qaýipsizdigin nyǵaıtýǵa jáne Ornyqty damý maqsattaryna qol jetkizýge baǵyttalǵan. Bul mindetterdi iske asyrý vedomstvoaralyq jáne halyqaralyq deńgeıdegi tyǵyz ózara is-qımyldy talap etedi. Osyǵan baılanysty Jaıyq ózeni men Kaspıı teńiziniń ekojúıelerin tıimdi basqarý Qazaqstan úshin strategııalyq mańyzǵa ıe, - dedi Sý resýrstary jáne ırrıgatsııa mınıstri Nurjan Nurjigitov.
Aıta ketelik jyl basynan beri Kaspıı teńizine 6 mlrd tekshe metrden astam sý jiberilgen edi.
