Jaıyq ózeni boıynda 240 shaqyrym bóget nyǵaıtyldy
ASTANA. KAZINFORM – Jaıyq ózeniniń kóterilý deńgeıine turaqty monıtorıng júrgizilip otyr. Bul týraly Tótenshe jaǵdaılar mınıstrliginiń resmı ókili Asqar Shárip málim etti.
«Aqtóbe jáne Túrkistan oblysynyń Tótenshe jaǵdaılar departamentinen kelgen jeke quram Jaıyq ózeniniń boıynda ornalasqan eldi mekenderde sý tasqynynyń aldyn alý jáne járdemdesý maqsatynda BQO jáne Atyraý oblysyna jiberildi. Atyraý oblysynda Jaıyq ózenine monıtorıng júrgizý jalǵasýda, sýdyń deńgeıi kóterilgeni baıqalady. Sý tasqynynyń aldyn alý maqsatynda Atyraý qalasynda bógetterdi nyǵaıtý jumystary úzdiksiz júrip jatyr», - dedi vedomstvonyń resmı ókili Asqar Shárip Ortalyq kommýnıkatsııalar qyzmeti alańynda ótken baspasóz máslıhatynda.
Resmı ókildiń málimdeýinshe, Jaıyq ózeni boıynda uzyndyǵy 240 shaqyrym qorǵanys bógetteri nyǵaıtyldy.
«Buǵan deıin kómekke kelgen kúshter men quraldar ýchaskelerge bólinip, tıisti jumystardy atqarýda», - deıdi vedomstvo ókili.
Eske sala keteıik, buǵan deıin Atyraý oblysynyń Mahambet aýdanynda Jaıyq ózeniniń jaıylmasyna sý aǵyp jatqany týraly habarlaǵan edik.
