Jaıyq ózeni basseıninde sý tasqyny kezeńine daıyndyq júrgizildi
ASTANA.KAZINFORM - «Qazsýshar» RMK Batys Qazaqstan fılıaly Jaıyq ózeni basseıninde aldaǵy sý tasqyny kezeńine daıyndyq jumystaryn júrgizip jatyr. Bul týraly Sý resýrstary jáne ırrıgatsııa mınıstrligi habarlady.
Oblystyń bes aýdanyndaǵy 87 eldi mekendi sýmen qamtamasyz etetin Oral-Kóshim sýarý-sýlandyrý júıesiniń sý qoımalary kaskadynda bos syıymdylyq qamtamasyz etilgen.
Qazirgi ýaqytta olardyń tolý deńgeıi jobalyq jalpy kólemniń 52%-yn quraıdy. Sonymen qatar Shaǵan ózenindegi sý qoımasynda da bos syıymdylyq bar. Nysan tranzıttik rejımde jumys istep tur.
Úlken jáne Kishi Ózen ózenderindegi sý qoımalarynda bos syıymdylyq jobalyq kólemniń 43%-yn quraıdy. Byltyr 2026 jylǵy kóktemgi sý tasqynyn qaýipsiz ótkizý maqsatynda «Qazsýshar» RMK Batys Qazaqstan fılıaly 20 gıdrotehnıkalyq nysandy jóndep, uzyndyǵy 163,7 shaqyrym bolatyn kanaldy mehanıkalyq tásilmen tazartty. Bıyl 21 nysandy jóndeý jáne uzyndyǵy 297 shaqyrym kanaldy tazartý josparlanyp otyr.
– Fılıalǵa qarasty barlyq nysan boıynsha kóktemgi kezeńge daıyndyq pasporttary ázirlendi. Sonymen qatar byltyr tórt nysanǵa kópfaktorly tekserýler júrgizilip, olardyń qaýipsizdik deklaratsııalary daıyndaldy. Avtokólik jáne arnaıy tehnıka parki jańartyldy. Sondaı-aq Reseı Federatsııasyndaǵy áriptesterimizben, onyń ishinde Orynbor jáne Saratov oblystary men Bashqurtstan Respýblıkasynyń sý sharýashylyǵy qyzmetterimen turaqty baılanys ornatylǵan, – dedi «Qazsýshar» RMK Batys Qazaqstan fılıaly dırektorynyń mindetin atqarýshy Raýan Hýsaınov.
Eske sala keteıik, Atyraý oblysy Qurmanǵazy aýdanynyń aýmaǵynan ótip jatqan Qıǵash ózeniniń arnalaryn tereńdetý jumysy júrip jatyr. Óıtkeni, tasqyn qaýpi bar. Bul týraly aýdan ákimi Abat Janǵalıev aıtty.
Batys Qazaqstan oblysynda «Sý tasqyny – 2026» aılyǵy jarııalanyp, keń aýqymdy sharalar, aktsııalar uıymdastyryldy.