Jaıyq ózeni arnasynan assa, Atyraý qalasyn sý basýy múmkin be
ATYRAÝ. KAZINFORM – Atyraý oblysyndaǵy Qulsary qalasyn Jem ózeniniń arnasynan asqan tasqyn sý basty. Mundaı jaıt Jaıyq ózeniniń jaǵalaýyndaǵy Atyraý qalasynda qaıtalanýy múmkin be?
Atyraý oblysy ákiminiń orynbasary Jasulan Bısembıevtiń aıtýynsha, Jylyoı aýdanynda tasqyn sýmen kúresýge daıyndyq eki apta júrgizilgen.
Munda úsh kúnnen beri tasqynǵa qarsy jumys júrip jatyr.
«Biraq, tasqyn sý Qulsary qalasyn basyp ketti. Zardap shekken baýyrlarymyzǵa barlyq kómek kórsetilip jatyr. Shyǵyn kólemi óteledi. Degenmen, Atyraý qalasy da bul „taǵdyrdy“ qaıtalaýy múmkin. Sý basý qaýpi Reseıdegi Orynbor, kórshiles Oral qalalaryndaǵy tasqynnan kem bolmaıdy degen boljam bar. Álbette daıyndyq júrip jatyr. Bes kúnnen beri óńirdiń 20 qurylys, munaı salasyndaǵy 6 kompanııasy Jaıyq ózeniniń jaǵalaýyn bekitýge kiristi. Olar qorǵanys bógetin salýǵa jumyldyryldy. Qajetti qapshyq, kúrek jáne taǵy basqa materıaldardyń rezervin daıyndalyp, ınertti zattar jınaqtaldy», -deıdi Jasulan Bısembıev.
Ákim orynbasarynyń pikirinshe, Jaıyq ózenine sý Reseıdiń Orynbor oblysyndaǵy Irıkla sý qoımasynan jiberiledi.
Sý Qazaqstan aýmaǵynda Batys Qazaqstan óńiri arqyly Atyraýǵa oblysyndaǵy Inder, Mahambet aýdandarynyń aýmaǵymen aǵyp keledi.
«Qazir Inder aýdanynda jaǵa bekitý jumystaryna 54 arnaıy tehnıka, 408 qyzmetker jumyldyrylǵan. Bul aýdanda Jaıyq ózeniniń jaǵalaýyndaǵy qaýipti aýmaqtarǵa jalpy uzyndyǵy 10 kılometr bóget soǵyldy. Bul jumystarǵa 37 950 dana qap paıdalanyldy. Al, Mahambet aýdanyndaǵy eldi mekenderdiń sýdan qorǵanys bógetiniń jalpy uzyndyǵy — 80 kılometr. Jaıyq ózeni boıyndaǵy 17 eldi mekenniń ishinde 9 qorǵanys bógeti osal. Olar Taldykól, Beıbarys, Alǵa, Mahambet, Sarytoǵaı, Eski Saraıshyq, Eńbekshil, Esbol jáne Ortaqshyl aýyldary tusynda ornalasqan», -dep málim etti Jasulan Bısembıev.
Mahambet aýdanynda sý tasqynynan qorǵaný úshin 56 myń qapqa topyraq qaptalyp, ózen jaǵalaýy bekitildi.
Bul jumystarǵa barlyǵy 95 tehnıka, 142 qyzmetker, 1300 erikti jumyldyryldy.
«Al, Atyraý qalasynda Jaıyq ózeniniń jaǵalaýyndaǵy 12 aýmaqty bekitý jumystaryn 172 tehnıka tartyldy. Qazir jaǵalaýda bıiktigi 2 metr, jalpy uzyndyǵy 7 kılometr bóget salyndy. Jumysta barlyǵy 100 myń qap paıdalanyldy. Bul jumys jalǵasyp jatyr», -deıdi ákim orynbasary.
Atyraý qalasynda Jaıyq jaǵalaýyndaǵy jumystardy 5 myńnan astam adam atqaryp jatyr.
Onyń ishinde ákimdiktiń, Qorǵanys mınıstriliginiń, Ulttyq ulannyń, tótenshe jaǵdaılar, polıtsııa departamentteriniń ókilderi jumyldyrylǵan.
Bul iske 4 myńǵa jýyq eriktiler toby úles qosýda.
Ákim orynbasarynyń pikirinshe, bul áli de jetkiliksiz bolyp otyr.
«Sebebi, 5 sáýirde Orynbor oblysyndaǵy Irıkla sý qoımasynan rekordty sý kólemin taǵy da jiberildi. Mundaı sý kólemi osy kezge deıin bolmaǵan. Sondyqtan birligimizdi tanytyp, Atyraý qalasyn tasqyn sý apatynan aman alyp qalýǵa jumylýymyz kerek. Bizge ár atyraýlyqtyń kómegi kerek. Barlyǵymyz bir kisideı Jaıyq jaǵalaýyndaǵy bógetti bıiktetip, bekitýimiz qajet. „Kóp túkirse — kól“ degendeı, ár azamat bir qap qumdy jaǵaǵa ákelse, úlken beket bolary sózsiz», -dep málim etti Jasulan Bısembıev.
Eske sala ketelik, buǵan deıin tasqyn sý Atyraý oblysyndaǵy Qulsary qalasyna kire bastaǵanyn jazǵan edik.
Qulsary qalasynda 2 500 úıdi tasqyn sý basyp, 4000 adam, onyń ishinde 1 myńnan astam bala kóshirildi.
Keıin Qulsaryda ákimdik, áleýmettik nysandar men ortalyq stadıon sý astynda qaldy.
