Jaıyq ózeni arqyly Qazaqstanǵa 6,43 mlrd tekshe metrden asa sý keldi

ASTANA. KAZINFORM — 2025 jyldyń alǵashqy jarty jylynda Jaıyq ózeni arqyly Qazaqstanǵa 6,43 mlrd tekshe metrden astam sý kelgeni anyqtaldy, dep habarlaıdy Sý resýrstary jáne ırrıgatsııa mınıstrligi.

«ıAnvartsevo» shekaralyq gıdrobeketiniń derekteri boıynsha, bıyl alty aıda Reseı aýmaǵynan Qazaqstanǵa Jaıyq ózeni arqyly 6,43 mlrd tekshe metrden astam sý kelgen.

Jaıyq transshekaralyq ózeniniń sý aǵysynyń 80%-ǵa jýyǵy Reseı Federatsııasy aýmaǵynda qalyptasady. Elimizde bul ózen Atyraý oblysy arqyly Kaspıı teńizine quıady. 

— Ózen sýynyń bólinýi 1996 jylǵy 20 maýsymda bekitilgen Jaıyq ózeni basseıninde transshekaralyq sý nysandaryn birlesip paıdalaný jáne qorǵaý, sý sharýashylyǵy qyzmetin úılestirý týraly Hattamaǵa sáıkes retteledi. Qujatta Reseı tarapynan Qazaqstanǵa jiberiletin sý kólemi aı saıyn naqtylanǵan, — dedi Sý resýrstary jáne ırrıgatsııa mınıstrligi Qytaı jáne Reseımen sý salasyndaǵy yntymaqtastyǵy basqarmasy basshysy Naǵıma Ájiǵulova.

Buǵan deıin habarlanǵandaı, Jaıyqtyń arnasy ózgerse, BQO-nyń 5 aýdanyna sý barmaı qalýy múmkin