«Jaıyq» komandasy voleıboldan Qazaqstan chempıony atandy

ORAL. KAZINFORM — Oral qalasyndaǵy «Jaıyq arena» sport kesheninde voleıboldan erlerdiń ulttyq lıga komandalary arasynda kezekti Qazaqstan chempıonaty máresine jetti.

Bıyl «Jaıyq» pen «Aqtóbe» komandalary altyn júldeni sarapqa saldy.

Oraldyq klýb «Kondensat» atalǵan kezde 1998 jáne 2014 jyly Qazaqstan chempıony atanǵan edi. Biraq keıin «Kondensat» tarap ketti de, Oralda kópke deıin ulttyq lıgada óner kórsetetin komanda bolmady. Tek 2023 jyly ǵana «Jaıyq» ulttyq lıgaǵa oraldy. Al sol jyly ulttyq lıgaǵa qosylǵan «Aqtóbe» ázirge chempıon atanyp kórmegen bolatyn.

Qazaqstan ulttyq quramasynyń bas bapkeri Vıktor Kozık jattyqtyratyn oraldyqtar 2024 jyly júldesiz qalsa, bıyl turaqty chempıonatty birinshi orynmen aıaqtady. 

Elimizdiń jastar quramasyn da baptap júrgen Sergeı Trıkozdyń shákirtteri 2024-2025 jylǵy maýsym barysynda el kýbogy men sýperkýbokty jeńip alǵan edi.

Eki jeńiske deıin sozylatyn fınal bıyl asa tartysty ótti. Alǵashqy kezdesýde aqtóbelikter 3:2 esebimen basymdylyq tanytsa, ekinshisinde oraldyqtar qarymta qaıyrdy — 3:2. Qos oıynda match taǵdyry on partııada sheshildi.

Sheshýshi, úshinshi básekede birinshi partııa sońynda «Jaıyq» kapıtany Vıtalıı Vorıvodın dop bergende, oraldyqtar sátti túıindedi — 25:19.

Ekinshi setti Borıs Kempa eıspen bastap, ony Vladımır Prokofev, qýatty soqqylarymen daralanǵan Vıtalıı Erdshteınder jalǵastyra bildi — 25:22.

Úshinshi set Aıbat Netalın, Damır Ákimov, Kırıll Kostylenko syndy sheber oıynshylary bar aqtóbelikterdiń paıdasyna sheshildi — 25:21.

Biraq tórtinshi partııany «Jaıyq» jeńispen támamdady — 25:21. Qorytyndy esep — 3:1.

Osylaısha, oraldyqtar chempıon atansa, «Aqtóbege» kúmis júlde buıyrdy.

Birinshilik sońynda jeńimpaz-júldegerler, úzdik oıynshylar marapattaldy.

- Bıylǵy chempıonat erekshe boldy dep aıta alamyn. Birinshilik barysynda jeńimpaz-júldeger kim bolatynyn boljaý qıyn edi. Óıtkeni aldyńǵy jeti komanda úmitker ekendigin baıqatty. Ásirese, «Atyraý» ekinshi, úshinshi týrdan keıin jetinshi orynda kele jatyp, jarys qorytyndysynda qola medalmen marapattaldy. Úsh kúnge sozylǵan fınal óte tartysty boldy. «Jaıyq» pen «Aqtóbe» quramynda da legıonerler bar, jattyqtyrýshylary da – belgili mamandar. Keremet oıyn órnegin kórsetkeni úshin qos komandaǵa alǵysymdy aıtamyn, - dedi Kazinform tilshisine Qazaqstan voleıbol federatsııasynyń vıtse-prezıdenti Ermek Syrlybaev.

Eske sala keteıik, budan buryn voleıboldan Qazaqstan chempıonatynda qola júlde úshin básekede «Atyraýdyń» esepti teńestirgenin jazǵan bolatynbyz.

Sondaı-aq altyn úshin talasta «Jaıyq» klýby kambekpen «Aqtóbeni» utty.