«Jaıyq» klýby Ortalyq Azııa chempıonatynyń fınalyna shyqty

ASTANA. KAZINFORM — Maldıv araldarynyń astanasy Male qalasynda voleıboldan ótip jatqan Ortalyq Azııa chempıondar lıgasynda Oraldyń «Jaıyǵy» búgin Qyrǵyzstannyń «Bishkek» komandasymen sheberlik baıqasty.

Osyǵan deıin týrnır kestesinde qyrǵyzstandyq komanda 11 upaımen kósh bastasa, «Jaıyq» (10 upaı) ekinshi orynda edi. Nepaldyń «Help SC» 8 upaımen úzdik úshtikti túıindep turǵan bolatyn.
Vıktor Kozık jattyqtyratyn batysqazaqstandyqtar keshe nepaldyq komandaǵa ese jibergendikten, fınalǵa shyǵý úshin búgin jeńis kerek edi. Bul mindetti «Jaıyq» komandasy tolyq oryndap, «Bishkekti» 3:0 esebimen utty.

Osylaısha, fınalǵa joldama alǵan oraldyqtar erteń osy «Bishkek» klýbymen altyn medal úshin talasady. 

Eske sala keteıik, budan buryn «Jaıyq» klýbynyń Ortalyq Azııa chempıonatynda Nepal komandasyna ese jibergenin jazǵan edik.