Jaıyq-Kaspıı basseıninde 116 mln-nan astam balyq qutqaryldy
ASTANA. KAZINFORM – Bıylǵy jyldyń kókteminde Jaıyq-Kaspıı basseıniniń sý qoımalarynda sý deńgeıi joǵary boldy. Tasqyn kezinde ózender tasyp, sýmen birge jaıylym aımaǵyna ýyldyryq shashyp bolǵan balyqtar men olardyń shabaqtary kóship ketken. Bul týraly QR AShM baspasóz qyzmeti málim etti.
Jaıyq-Kaspıı ózenderiniń oblys aralyq basseındik ınspektsııasy Jaıyq ózeniniń negizgi arnasyndaǵy sý deńgeıi tómendegennen keıin paıda bolǵan shyǵanaqtardan balyqtar men olardyń shabaqtary ótý úshin kanaldar qazý arqyly balyq sharýashylyǵyn jaqsartý sharalaryn uıymdastyrdy.
2024 jyldyń maýsym aıynyń basynan bastap bólinip qalǵan sý qoımalarynan 116 mln-nan astam balyqtar men olardyń shabaqtary qutqaryldy, onyń ishinde Atyraý oblysynda 91 mln-nan astam, Batys Qazaqstan oblysynda 25,3 mln.
Ortasha salmaǵy 12-14 gramm bolatyn sazan, alabuǵa, shortan, qarabalyq shabaqtary qutqaryldy jáne keıinnen Jaıyq pen Qıǵash ózenderine tirideı jiberildi.
Jaıyq-Kaspıı basseıniniń sý qoımalarynan balyq shabaqtaryn qutqarý jumystary jalǵasýda jáne turaqty baqylaýda.
