«Jaıyq» fýtbol klýby birinshi lıgaǵa joldama aldy

ORAL. KAZINFORM – «Jaıyq» fýtbol klýby ekinshi lıgada Ońtústik-Batys konferentsııasy boıynsha chempıon atandy.

Jergilikti maman Vıacheslav Nevolnıkov jattyqtyratyn oraldyq komanda konferentsııada 39 upaımen kósh bastap tur.

Ekinshi oryndaǵy «Jas qyran» (Almaty) komandasynyń 34 upaıy bar.

Osylaısha, qalǵan eki kezdesýdiń nátıjesine qaramastan, «Jaıyq» birinshi lıgaǵa joldama aldy. 

17 qyrkúıek kúni «Jaıyq» óz alańynda «Ordabasy jastar» komandasyna 1:2 ese jiberdi. 24 qyrkúıekte oraldyqtar syrt alańda «Kaspıı jastar» klýbymen kezdesedi. Sodan keıin chempıonatty 1 qazan kúni «Aqjaıyq» stadıonynda «Jas qyranmen» qorytyndylaıdy. 

— «Ordabasy jastar» komandasymen ótken oıyn biz úshin óte qıynǵa tústi. Óz alańymyzda ese jiberdik. Degenmen qoldaýǵa kelgen jurttyń qarasy qalyń boldy. Barsha jankúıerlerge alǵysymyz sheksiz. Áli 2 oıynymyz bar, tyńǵylyqty daıyndalamyz, chempıon boldyq, biraq birinshilik bitken joq. Maýsym boıy jeńis úshin ter tóktik, alar asýymyz alda dep oılaımyz, — dedi «Jaıyqtyń» kapıtany Baýyrjan Omarov. 

Bıyl jyl basynda 1968 jyldan bergi tarıhy bar «Aqjaıyq» fýtbol klýby taratylǵan bolatyn. Onyń ornyna «Jaıyq» klýby qurylǵan edi. 

Eske sala keteıik, budan buryn Batys Qazaqstanda jańa fýtbol klýby qurylǵanyn jazǵan edik.