Jaıyq deńgeıi kún saıyn tómendep, Inder aýdanynda qaýipti shekke deıin tústi

ATYRAÝ. KAZINFORM – Jaıyq ózenindegi sý deńgeıi kún saıyn tómendep jatyr. Búgin Inder aýdanynda qaýipti shekke deıin tústi.

Atyraý oblysy jedel shtabynyń málimetinshe, birneshe kúnnen beri Jaıyq ózeniniń sýy baqylaýǵa alynǵan gıdrobekettiń bárinde tómendegeni tirkelip otyr. Máselen, búgin, 14 maýsymda túsqaıta saǵat 16:00-de Inder aýdanynda sý arnasynyń deńgeıi 8 metr 45 santımetrdi qurady. Bul aýdandaǵy qaýipti shektiń mólsheri – 8 metr 45 santımetr. Demek, Jaıyq ózeniniń sýy kún saıyn tómendep, búgin qaýipti shektiń deńgeıine jetti.

Al, Mahambet aýdanynda qaýipti shek 8 metr 50 santımetr deńgeıinde belgilengen. Búgin batyr atyndaǵy aýdanda da Jaıyq ózeniniń sýy azaıdy. Qazir munda ózen arnasynyń deńgeıi 9 metr 73 santımetrdi kórsetip tur. Bul qaýipti shekten áli de 1 metr 23 santımetrge kóp.

Jaıyq ózeniniń sýy Atyraý qalasynda da azaıyp jatyr. Kúndizgi saǵat 16:00-degi málimetke qaraǵanda, ózen deńgeıi 5 metr 85 santımetr boldy. Degenmen, qaýipti shekten 35 santımetrge asyp tur.

Sondaı-aq, Atyraý qalasynyń mańyndaǵy Jańatalap aýylynda 419, al, Erkinqala eldi mekeninde 376 santımetrdi kórsetti.

Eske sala ketelik, budan buryn sý tasqynynan Mahambet aýdanyndaǵy 5 aýylǵa áli de qaýip bar ekenin habarlaǵan bolatynbyz.