Jaıyq deńgeıi Atyraý oblysynyń 2 aýdanynda qaýipti belgiden asyp ketti
ASTANA. KAZINFORM – Jaıyq ózenindegi sý deńgeıi Inderbor jáne Mahambet aýdandaryndaǵy sý beketterinde qaýipti belgiden asyp túsip jatyr. Bul týraly Úkimet otyrysynda Premer-Mınıstrdiń orynbasary Qanat Bozymbaev aıtty.
«Qazir Jaıyq ózenindegi sý deńgeıi Inderbor jáne Mahambet aýdandaryndaǵy sý beketterinde qaýipti belgiden asyp túsip jatyr. Óńirde bógetterdi kúsheıtý jumystary jalǵasady. Osy óńirde barlyǵy 500 shaqyrymnan astam bóget salynǵan bolatyn. Elimizdiń óńirinde jergilikti aýqymdaǵy tótenshe jaǵdaı rejımi saqtalyp otyr. Aqtóbe oblysynda 2 eldi meken áli de kólik qatynasynsyz. Olar azyq-túlikpen jáne dári-dármekpen qamtamasyz etilgen. Úsh óńirde 10 kúıdirgi kómilgen jerdi sý basqan bolatyn. Qazir tıisti qyzmetter jergilikti jerlerde jedel dızenfektsııalyq is-sharalar júrgizip jatyr», — dedi Úkimet basshysynyń orynbasary.
Vıtse-premer dereginshe, sý tasqynyna qarsy is-sharalardy júrgizý úshin 7 myńnan astam adam jáne 1 900 birlik tehnıka, onyń ishinde 6 áýe kemesi jumyldyryldy. Tótenshe jaǵdaılar mınıstrligi, polıtsııa, Ulttyq ulan, Qorǵanys mınıstrligi, jergilikti atqarkshy organdar kúshterimen quraldary tartyldy. Jeke uıymdar men erikteler qatysyp jatyr.
«Sý basý aımaqtarynan 119 myńnan astam adam evakýatsııalandy. Onyń 44 myńy — balalar. Búgingi tańda 55 600 adam úılerine oraldy. Evakopýnktterde shamamen 5 myń adam qaldy, týystarynda 58 myńnan astam adam ornalasqan», — dedi Qanat Bozymbaev.
Onyń aıtýynsha, sý tasqyny saldarynan elimizde 12 908 turǵyn úı sý astynda qaldy. Onyń ishinde 3 óńirde 264 úı áli de sý astynda qalyp otyr. Sondaı-aq 25 921 saıajaı ýchaskesi sýdan zardap shekti. Onyń ishinde 18 025 saıajaı úıi bar. Zardap shekken úılerdi jáne saıajaılardy taldaý jumystary qazir jalǵasyp jatyr. Kelesi aptada tıisti shyǵyn somasy belgili bolady.
