Jaıdarmanshylar taldyqorǵandyqtarǵa tamasha ázil keshin syılady
TALDYQORǴAN.QazAqparat - Qala kúni merekesi qarsańynda, Esen Eleýken bastaǵan jaıdarmanshylar taldyqorǵandyqtarǵa arnap, ázil-qaljyń baıqaýyn ótkizdi. Baq synaǵan 11 komanda Taldyqorǵan qalasynyń ákimi Baǵdat Qarasaevtyń kýbogyn sarapqa saldy, dep habarlaıdy QazAqparat tilshisi.
Ázil keshin bastan-aıaq tamashalaǵan qala basshysy jaıdarmanshylarǵa zor alǵys bildirip, shyǵarmashylyq tabys tiledi.
«Búgin óte ádemi kesh boldy. Komandalardyń daıyndyǵy da kórinip tur. Osyndaı ónerli qyz-jigitterdi Jetisýdyń tórine alyp kelgen Esen Eleýkenge zor alǵys! Aldaǵy jyldary ártistigi men sheberligi kózge túsken jeke oıynshylardy da atap ótý qajet eken. Búgin mádenıet saraıyna kóp halyq sımaı qaldy. Buıyrsa, kelesi jyly Taldyqorǵanda jańa drama teatr salynady. Endigi oıyndaryńyzdy sol jerde ótkizseńizder, nur ústine nur bolar edi. El-jurtty osyndaı ótkir de, astarly ázilderińizben tamsandyryp júre berińizder»,- dedi qala basshysy.
Sonymen, qazylar alqasynyń sheshimimen 1-oryn men qala ákiminiń kýbogyn almatylyq ІT quramasy jeńip alyp, 200 myń teńgeni qanjyǵalaryna baılady. Al, 2-orynǵa tigilgen 150 myń teńgeni Sport jáne týrızm akademııasynyń «Tomırıs» qyzdar quramasy ıelense, 3-oryndy taldyqorǵandyq «Shapalaq» komandasy jeńip alyp, 100 myń teńgeni oljalady. Jaıdarmanǵa qatysqan barlyq komandaǵa qala ákiminiń Alǵys hattary tapsyryldy.
Aıta ketý kerek, Taldyqorǵanda qala kúnine arnalǵan merekelik sharalar 8-shi qyrkúıekten bastaldy. Túrli shyǵarmashylyq baıqaýlar, sheberlik sabaqtary, retro kontsertter men sporttyq saıystar, tanymal tulǵalarmen kezdesýler, áleýmettik nysandardyń ashylýy, kásiporyndardyń tusaýkeserleri sekildi kóptegen sharalar bıylǵy merekeniń sánin kirgizetin bolady. Al, negizgi mereke 30-qyrkúıekte saǵat 10-00-de qalanyń ortalyǵynan bastalyp, Jastar sport saraıynyń mańy men «Jastar» saıabaǵynda jalǵasady.
